काठमाडौँ । निर्वाचन आयोगले पछिल्लोपटक चलाएको फोटोसहितको मतदाता नामावली संकलन अभियानमा झण्डै आठ लाख मतदाता थपिएका छन् ।

आगामी निर्वाचनलाई लक्षित गरी मतदाता नामावली संकलन अभियान चलिरहँदा अहिलेसम्म ७ लाख ९३ हजार ७ सय ५५ मतदाता थपिएका छन् ।
निर्वाचन आयोगले गत मंसिर १७ देखि देशब्यापी रुपमा मतदाता नामावली संकलन अभियान चलाएको छ ।

संकलित तथ्यांकमा युवाको संख्या मात्रै करिब ६ लाख रहेको आयोगले जनाएको छ । यसअघि कुल मतदाता संख्या १ करोड ६० लाख हाराहारी थियो ।

आयोगले अहिले पनि २ सय २५ स्थानमा नामावली संकलन जारी राखेको छ । स्थानीय तह स्तरमा भएको नामावली संकलन कार्य सकिएको प्रमुख निर्वाचन आयुक्त दिनेशकुमार थपलियाले बताए । स्थायी ठेगानाभन्दा फरक स्थानमा बसोबास गर्ने २८ हजारले पनि नाम दर्ता गराएको आयोगले जनाएको छ ।

आयोगकाअनुसार इलाका र जिल्ला प्रशासन, निर्वाचन कार्यालयमा सार्वजनिक बिदाको दिनबाहेक नामावली दर्ता गराउन सकिने जनाएको छ ।

चुनावको मिति घोषणा नभएसम्म नामावली संकलन जारी रहने निर्वाचन आयोगले जनाएको छ ।

आयोगले स्थानीय तहको निर्वाचन आउँदो वैशाख १४ देखि २२ सम्म गर्न सरकारलाई प्रस्ताव गरेको छ । प्रदेश र प्रतिनिधिसभाको निर्वाचन पनि ०७९ फागुन २० भित्र गरिसक्नुपर्नेछ ।