काठमाडौ । नेकपा (माओवादी केन्द्र)को आठौं महाधिवेशनले अमेरिकी सहयोग नियोग मिलेनियम च्यालेन्ज कर्पाेरेसन एमसीसी अनुदान सम्झौता यथास्थितिमा पारित गर्नु नहुने निर्णय लिएको छ । पार्टीको काठमाडौंमा सम्पन्न आठौं महाधिवेशनबाट माओवादीले यस्तो निर्णय लिएको हो । महाधिवेशनले पारित गरेको माओवादीको ४५ बुँदे समसामायिक प्रस्तावमा यथास्थितीमा एमसीसी सम्झौता पारित गर्न नहुने उललेख गरिएको छ ।

प्रस्तावमा भनिएको छ,- राष्ट्रव्यापी तथा अन्तर्राष्ट्रिय रूपमै गम्भीर छलफलमा रहेको नेपाल सरकार र एमसीसी बिच भएको सम्झौताका कतिपय प्रावधानहरू नेपालको राष्ट्रियता, सार्वभौमिकता, स्वाधीनता र हित प्रतिकूल असर पर्ने देखिएकाले यथास्थितिमा उक्त सम्झौता पारित नगरियोस । यस विषयमा सम्पूर्ण राजनीतिक दल, सरकार र संसद सहित समग्रराष्ट्रिय सहमति कायम गर्दै अघि बढ्न यो महाधिवेशन माग गर्दछ ।

त्यस्तै माओवादीको महाधिवेशनले निर्वाचन आयोगले पार्टीको विचार माथी अनाधिकृत हस्तक्षेप गर्न खोजेको भन्दै त्यसमा कडा असहमती र आपत्ति समेत जनाएको छ । पार्टीको विधानमा साभ्यवाद जस्ता शब्द हटाउने आयोगको निर्णयप्रति माओवादीले आपत्ति र असहमति जनाएको हो । महाधिवेशनले पारित गरेको यससम्वनधी प्रसतावमा भनिएको छ,-विचारको आधारमा पार्टी गठन गर्ने संविधानको भावना विपरित पार्टीको विधानमा केही उल्लेखित विचार माथी अनाधिकृत हस्तक्षेप गरी अनुचित निर्देशन गरेकोमा त्यसप्रति यो महाधिवेशन कडा असहमति र आपति प्रकट गर्दै त्यसबारे आवश्यक कदम चाल्न पार्टी केन्द्रीय समितिलाई निर्देशन गर्दछ ।

त्यस्तै माओवादीले लिम्पियाधुरासम्मको नेपाली नक्सालाई पाठयक्रममा समावेश गरी राष्ट्रियताको भावना सुदृढ गर्न सरकारसमक्ष माग पनि गरेको छ । माओवादीको पारित समसामायिक प्रस्तावमा भनिएको छ, – कालापानी,लिपुलेक लिम्पियाधुरा लगायत नेपाली भूमि रक्षाका लागि सदैव संघर्षरत रहने प्रण गर्दछ । साथै संघीय संसदबाट पारित पूर्ण नक्शालाई पाठ्यक्रममा समावेश गरी राष्ट्रियताको भावना सुदृढ गर्न सरकारसमक्ष माग गर्दछ ।

त्यस्तै उसले सन् १९५० को असमान सन्धि लगायतका सबै असमान सन्धि–सम्झौताहरू खारेजी र सार्वभौमिक समानता र आपसी हितका आधारमा आवश्यकता अनुसार नयाँ सन्धि–सम्झौताका लागि आवश्यक पहलकदमी लिन नेपाल सरकार,देशका सबै राजनीतिक दलहरू र सरोकारवालाहरूलाई पनि विशेष अपील गरेको छ ।

हेर्नुहोस माओवादी महाधिवेशनले पारित गरेको समसामायिक प्रस्तावहरु