काठमाडौं । हुम्लाको सिमकोटसहित जिल्लाका उच्च क्षेत्रमा शुक्रबार बेलुकाबाट हिमपात भएको छ । शुक्रबार बेलुकादेखि लगातार परेको हिमपातले सदरमुकाम सिमकोट सेताम्य भएको छ ।

एक फिट जमेको हिउँले गर्दाे स्थानीयवासीलाई घरबाट बाहिर निस्कन समस्या भएको छ । यहाँको तापक्रम माइनस १२ भन्दा तल झरेपछि जाडो अत्यधिक बढेको छ ।

हिमपातले नाम्खा गाउँपालिकाको मलिमी, मुचुलगायतका क्षेत्रमा चार फिट हिउँ जमेको तुमकोटका स्थानीय छपाल लामाले बताए । उनकाअनुसार यो यस वर्षकै ठूलो हिमपात हो । चिसोले खानेपानीका धारा तथा खोलाका पानी समेत जमेका छन् ।

निरन्तर हिउँसँगैको अत्यधिक चिसोले सिमकोट आसपासको जनजीवन प्रभावित बनाएको सहायक प्रमुख जिल्ला अधिकारी दशरथ राईले बताए ।