काठमाडौं । स्याङ्जा वालिङ नगरपालिका–१२, सिर्सीबोटका १६ महिने बालक साइमन गुरुङको घाटी रेटर हत्या भएको छ ।

तरकारी काट्ने चक्कुले प्रहार रेटेर बालकको हत्या गरेको प्रहरीले जनाएको छ ।

भकुण्डेमा डेरा गरी बस्ने रनमाया गुरुङको छोरा १६ महिनाको साइमन गुरुङको हत्या भएको जिल्ला प्रहरी कार्यालय, स्याङ्जाका डीएसपी राजेन्द्रप्रसाद अधिकारीले मेरोन्यूजलाई जानकारी दिए ।

उनले मेरोन्यूजसँको संवादमा भने ‘अन्दाजी दिउँसो १ बजे चक्कु प्रहार भएको हो, तत्काल उपचारका लागि प्राथमिक स्वास्थ्य केन्द्र वालिङ पठाइएकामा डाक्टरले मृत घोषित गरेका थिए, घटनामा गुरुङकी दिदी ५ वर्षीया साइना पनि घाइते छिन्, उनको अवस्था मध्यम छ ।’

घटनामा संलग्न भएको अभियोगमा एउटै घरमा डेरा गरी बस्ने ३३ वर्षीय जितेन्द्र गुरुङ पक्राउ परेका छन् । प्रहरीका अनुसार साइमनको घाँटीमा चक्कु प्रहार भएको थियो । गुरुङले किन नाबालकलाई चक्कु प्रहार गरे भन्ने खुलिसकेको छैन ।

प्रहरीले यस घटनाबारे थप अनुसन्धान गरिरहेको छ ।