काठमाडौं । लिपुलेक, लिम्पियाधुरा, कालापानी क्षेत्रमा भारतले एकतर्फी रूपमा सडक बनाएको भन्दै राप्रपाले आपत्ति जनाएको छ।

राप्रपाले शनिबार विज्ञप्ति जारी गर्दै लिपुलेक लिम्पियाधुरादेखि कालापानी क्षेत्र नेपाली भूमि रहेकाले त्यसको अतिक्रमण र हस्तक्षेपविरूद्ध सरकारले प्रतिवाद गर्नुपर्ने बताएको हो ।

राप्रपा महामन्त्री भुवन पाठकले विज्ञप्ति जारी गर्दै भारतले सार्वजनिक रूपमा सडक निर्माण गरिरहेको अभिव्यक्ति दिँदा पनि सरकार र सत्तारूढ गठबन्धन मौन रहनु दुखद र रहस्यमय रहेको उल्लेख गरेका छन् ।

‘भारतले सार्वजनिक रुपमा सडक निर्माण गरिरहेको अभिव्यक्ति दिइरहँदा नेपाल सरकार र सत्तारूढ गठबन्धनको पनि आश्चर्यजनक मौनता दुःखद् र रहस्यमय छ,’ विज्ञप्तिमा भनिएको छ, ‘नेपाली भूमिमा भइरहेको हस्तक्षेपका बारे नेपाल सरकारले भारतसँग कूटनीतिक र राजनीतिक तहमा संवाद गरोस् ।’

भारतले आफूखुशी गरेको बाटो निर्माण कार्य रोक्न र आफ्नो भूमिको रक्षा हुने गरी समाधान निकाल्न पाठकले सरकारसँग माग गरेका छन् ।