काठमाडौं । नेपालमा राजनीतिक दलहरु खुल्ने बाढी चलिरहँदा महिलाहरु मात्रै अटाउने नयाँ पार्टी घोषणा गरेका छन् ।

आफूहरु बैकल्पिक राजनीतिमा आउने भन्दै उनीहरुले बैकल्पिक महिला संगठन घोषणा गरेका हुन् । संगठनको नेतृत्व विद्या श्रेष्ठ महर्जनले गरेकी छन् । उनले काठमाडौँको रैथाने समुदायको हकहितका निम्ति विभिन्न अभियानहरु चलाउँदै आएकी थिइन् ।

विवेकशील साझा पार्टीभित्रको द्वन्द्वबाट वैकल्पिक राजनीति गलत दिशामा जान सक्ने खतरा रहेको भन्दै आफूहरुलाई बैकल्पिक संगठन दावी गरेका छन् ।

संगठनको वर्तमान केन्द्रीय समिति २५ सदस्यीय रहने शनिवार घोषणा गरिएको छ । तर १६ जनाको नाम मात्रै पहिलो पटक सार्वजनिक गरिएको छ । चण्डिका तिमल्सिना र सोनिका लामालाई केन्द्रीय सदस्यका साथै सल्लाहकार बनाइएको छ । अन्य सबैलाई सदस्य मात्र तोकिएको छ ।

अन्य केन्द्रीय सदस्यहरूमा प्रतिभाञ्जली पोखरेल, प्रेक्षा पण्डित, आशा ठाकुर, समासिं महर्जन, आरती कुसवा, निर्जला तामाङ, रबिना थापा, प्रियंका मिश्र, मेनुका पौडेल, रीतु खड्का, विनिता चौलागाईं, रबिना दंगाल र नाबिता शर्मा रहेका छन् । संगठनका अधिकांश महिलाहरु एनजीओवाला हुन् ।

महिलाहरूसँग सम्बन्धित नीति, कार्यक्रम र समस्याको समाधानबारे बहस चलाउने तथा वैकल्पिक राजनीतिमा महिलाहरुको अर्थपूर्ण सहभागिता र अग्रणी नेतृत्व स्थापित गर्ने वैकल्पिक महिला संगठनको मूल ध्येय हुने संगठनको संयोजक महर्जनले बताइन् ।