काठमाडौँ । भारतमा कोरोना भाइरस (कोभिड–१९)बाट पछिल्लो एक दिनमा थप दुई लाख ५८ हजार ८९ जना संक्रमित भएका छन् । अघिल्लो दिनको तुलनामा दैनिक संक्रमितहरुको संख्या घटेको देखिएको केन्द्रीय स्वास्थ्य मन्त्रालयले सोमबार जनाएको छ ।

आइतबार सार्वजनिक गरिएको विवरणअनुसार पछिल्लो २४ घण्टामा दुई लाख ७१ हजार २०२ जना नयाँ संक्रमित थपिएका थिए । भारतमा अहिलेसम्म कूल तीन करोड ७३ लाख ८० हजार २५३ जना कोरोनाबाट संक्रमित भएका छन् ।

तीमध्ये १६ लाख ५६ हजार ३४१ जना अहिले पनि संक्रमित अवस्थामै छन् । संक्रमित अवस्थामै रहेकाको संख्या दिनप्रति दिन बढ्दै गइरहेको पनि मन्त्रालयका अधिकारीहरुले जनाएका छन् । अहिलेसम्म संक्रमितमध्ये आठ हजार २०९ जना मात्रै ओमिक्रोनबाट संक्रमित रहेको पाइएको छ ।

पछिल्लो २४ घण्टामा भारतमा कोरोनाबाट संक्रमणमुक्त भएकाहरुको संख्या एक लाख ५१ हजार ७४० रहेको छ । यस्तै, पछिल्लो एक दिनमा ३८५ जनाको कोरोनाबाट मृत्यु भएको छ । अहिलेसम्म कोरोनाका कारण मृत्यु हुनेको संख्या चार लाख ८६ हजार ४५१ पुगेको छ ।