काठमाडौँ । विदेशबाट मंहगा मदिरा आयत गरी बिक्री गर्ने रिटेल शप ‘ग्रीन लाइन’ बन्द गरी सञ्चालकहरु फरार हुनुमा चर्को मिटर ब्याज भएको प्रहरीले जनाएको छ । महानगरीय प्रहरी परिसर काठमाडौंले उनीहरुको खोजी गर्ने क्रममा शहरमा मिटर ब्याजको धन्दा र कोरोना संक्रमणकै कारण फरार भएको आशंका गरेको हो ।

महानगरीय प्रहरी परिसर काठमाडौंका अनुसार आफ्नो पैसा डुबेको र खोजी दिन आग्रह गर्दै धेरै व्यक्तिहरुले प्रहरीमा मौखिक उजुरी गरेका छन् । त्यसमा केही सहकारीका सञ्चालकहरु पनि रहेका छन् । तर धेरै जसो व्यक्तिहरु नै भएकाले उनीहरुको बारेमा प्रहरीले सूक्ष्म अध्ययन गरिरहेको जनाएको छ ।

‘हामीले अग्रवाल परिवार फरार हुनुका पछि ऋण बढी भएको हो कि भन्ने आशंका गरेका छौँ, बैंक तथा वित्तीय संस्थाहरुले उनीहरुको अचल सम्पत्तिमा दाबी गरिरहेका छन् । त्यसबाहेक अन्य व्यक्तिहरु पनि सम्पर्कमा रहेकाले उनीहरुले भाग्नु पर्ने कारणमध्ये यही नै प्रमुख कारण हो भन्ने हाम्रो अनुमान मात्रै हो । उनीहरुको खोजी कार्य जारी छ, भेटिनु भयो भने केही कुराहरु पत्ता लाग्ला’, परिसरका प्रवक्ता एसपी दिनेश मैनालीले भने ।

परिसर स्रोतका अनुसार प्रहरी कार्यालयमा दर्जनभन्दा बढी व्यक्तिहरु आफ्नो पैसा डुबेको भन्दै अग्रवाल परिवारको खोजी गरिदिनु आग्रह गर्न परिसर काठमाडौँ पुगेका छन् । बैंक तथा वित्तीय संस्था मात्र होइन व्यक्तिगत ऋणसमेत लिएका अग्रवाल परिवारले ऋण तिर्न नसकेकाले भागेको हुन सक्ने आंकलन गरिएको छ ।

हाल ग्रीन लाइनका सञ्चालक अमित र अभिषेक अग्रवाल सम्पर्कमा छैनन् । बाबु ओमप्रकाश अग्रवालसहित सबै परिवार सम्पर्क बाहिर भएपछि प्रहरीले उनीहरुको खोजी गरेको छ । दुई दाजुभाइ र उनीहरुको खोजीमा अहिले प्रहरी प्रशासनसमेत लागेको भए पनि उनीहरु कहाँ छन् भन्ने बारेमा प्रहरीले जानकारी पाएको छैन ।

जानकारका अनुसार करोडौंको कारोबार गर्ने रेपुटेड कम्पनी छाडेर अग्रवाल परिवार भाग्नुका पछाडि आर्थिक संकट नै हो । बुबा ओमप्रकाशले तयार पारेको व्यापारिक साम्राज्य दुई भाइको महत्वाकांक्षाले डुबाइएको अनुमान गरिएको छ । रिटेल शपमा अहिले एभरेष्ट बैंक र नेपाल इन्भेष्टमेन्ट बैंकले सूचना टाँस्दै ‘सबै स्टक आफ्नो स्वामित्वमा रहेको’ भन्दै सिलबन्दी गरेका छन् । मेगा बैंकले कुलेश्वरमा रहेको जग्गालाई लिलामीमा राखेको छ ।

सबै परिवार सम्पर्कबाहिर रहँदा उनका छोरी ज्वाइले प्रहरीमा खोजबिनका लागि उजुरी दिएका छन् । छोरी ज्वाइसँगै पैसा मागेर उनीहरु फरार रहेको खुलेको छ । अग्रवाल दाजुभाइको खोजीमा प्रहरी प्रशासनसमेत लागेको छ

एमालेका केन्द्रीय सदस्य महेश बस्नेत उद्योगमन्त्री हुँदा २०७२ असोज १ गते बसेको औद्योगिक प्रबर्द्धन बोर्डको २१६ औं बैठकले मदिरा उद्योगको इजाजत खुला गर्ने निर्णय गरेपछि उनीहरुले विदेशी मदिराको कारोबार थालेका थिए । मदिरा व्यवसाय गर्ने क्रममा उनीहरुले पाँच करोड रुपैयाँ लिएका थिए । तर त्यही रकम केही वर्षमै १८ करोड पुगेपछि उनीहरुको ओरोलो यात्रा शुरु भएको अनुमान छ ।

व्यापारिक क्षेत्रमा उनलाई चिन्नेहरुले मिटर ब्याजकै रकम मात्रै ५० करोड रुपैयाँभन्दा माथि पुगेपछि भार थेग्न सकेनन् । मिटर ब्याजकै पैसा तिर्न नसक्दा ज्यान मार्ने, परिवारका सदस्य अपहरण गर्नेसम्मको धम्की आएपछि उनीहरुले बिना धितो तीन÷चार वटा सहकारीबाट पनि ऋण चलाएका थिए ।

कोभिडका कारण होटल र रेष्टुरेन्ट बन्द भएपछि मदिराको कारोबार ठप्पजस्तै भएकाले उनीहरु थप समस्या पर्दै गएकाले व्यापार छाड्नु परेर भागेका हुन् । स्रोतका अनुसार क्यासिनो, तारे होटल, रेष्टुरेन्ट र राम्रा पार्टी प्यालेसमा झण्डै २० करोड रुपैयाँ उधारो बाँकी रहेको छ । यतिबेला उनीहरु भागेपछि पैसा तिर्नु पर्नेहरुलाई सहज भएको छ ।

प्रहरीको निगरानी कता ?

उनीहरु फरार रहेपछि बैंकहरुले दरबारमार्गमा रहेको पसलमा सिलबन्दी गरे । त्यसपछि कुलेश्वरमा रहेको जग्गामा बैंकले दाबी गरेको छ । केही अचल सम्पत्तिलाई बैंकहरुले लिलामीको प्रकृयासमेत थालेको अवस्थामा महानगरीय प्रहरी परिसर काठमाडौँले उनीहरुको खोजी कार्य शुरु गरेको छ ।

प्रहरीका अनुसार उनीहरुले प्रयोग गर्दै आएको गाडी लिएर भागेका छन् । पछिल्लो पटक उनको गाडी कता गएको थियो भनेर प्रहरीले गाडी नम्बरका आधारमा सुराकी खोजी गरिरहेको छ ।

अग्रवाल परिवारका ९ जना सदस्य छन् । जसमा ओमप्रकाश, अमित, अभिषेक, भारती, उषा, रुचिका, १७ वर्षीय नातिनी नन्दनी, ९ वर्षीय पार्था र २ वर्षीय अनव अग्रवाल छोरी ज्वाइ र आफन्तहरुको सम्पर्क बाहिर रहँदा उनीहरुले प्रयोग गरेको गाडी मुख्य सुराकी हुन सक्ने प्रहरीको अनुमान छ ।

उनीहरुले प्रयोग गरेको मोबाइल ट्रयास गर्दा ज्ञनेश्वरस्थित घरमै स्वीच अफ गरेका कारण कहाँ पुगे भन्ने बारेमा केही बताउन सकेको छैन । ‘उनीहरुको खोजी गरिहेका छौँ केही सम्पर्क छैन सूत्रमार्फत खोजी कार्य जारी छ’, परिसर प्रहरी प्रवक्ता एसपी मैनालीले भने ।

प्रहरीले उनीहरूले प्रयोग गर्ने मोबाइलमा पनि सम्पर्क गरेको थियो । मोबाइलको कल ट्रेसिङ गर्दा उनीहरू कहाँ गएको भन्ने खुल्न सकेको छैन । पछिल्लोपटक उनीहरु जान सक्ने स्थानको बारेमा प्रहरीले निगरानी गरेको छ ।

यद्यपि, नेपाल–भारत सीमा क्षेत्रमा उनीहरुको कल ट्रेसिङ देखिएको छैन । प्रहरीले उनीहरुको घर पुगेर सोधखोज गर्ने क्रममा एउटा कागज फेला पारेका थियो । त्यसमा आफ्नो सम्पत्ति सबैले बाँडेर लिनु भन्ने उल्लेख भएको प्रहरीले जनाएको छ । उनीहरुको आफन्तहरुसँग पनि प्रहरीले सोधपुछ गरिरहेको र अन्य विवरण जानकारी लिइरहेको छ ।

प्रहरीले संकलन गरेका प्रमाणले उनीहरु कहाँ पुगे भन्ने यकिन हुन सकेको छैन ।