काठमाडौं । ट्राफिक प्रहरीले काठमाडौं उपत्यकाभित्र कारवाहीमा परी आवश्यक कागजात खिचिएको अवस्थामा आफ्नो कागजात कुन कार्यालयमा पुगेको छ भन्ने थाह पाउन डकुमेण्ट ट्रयाकिङ सिष्टम प्रयोग गर्न आग्रह गरेको छ ।

सो ट्याकिङ सिष्टम प्रयोग गर्दा एसएमएस गर्नुपर्ने र एसएमएस गरेको केही समयमै त्यसको जानकारी दिने पनि ट्राफिक प्रहरीले जनाएको छ । ‘काठमाडौ उपत्यकाभित्रका ललितपुर, भक्तपुर, काठमाडौका कुन ट्राफिक प्रहरी कार्यालयमा आफ्नो कागज रहेको छ भन्ने जानकारी दिन्छ’, महानगरीय ट्राफिक प्रहरी कार्यालयका प्रमुख एसएसपी उमेशराज जोशीले भने ।

उनका अनुसार प्रयोगकर्ताले आफ्नो मोबाइलको म्यासेज बक्समा गएर इचालेन टाइप गरी एक स्पेश छाडेर आर्थिक वर्ष र चिट नम्बर लेखी ३४००१ म एसएमएस पठाउने पर्नेछ । सो म्यासेज पठाएको केही समयमा ट्राफिक प्रहरीले खिचिएको कागजपत्र कुन कार्यालयमा पुगेको छ भनेर एसएमएस मार्फत नै जानकारी दिनेछ ।

ट्राफिक प्रहरीले चिट काटेको केही समयपछि मात्रै डकुमेण्ट ट्रयाकिङ सिष्टम सक्रिय हुनेछ ।

यसैगरी ट्राफिक प्रहरीले दिने सेवालाई थप प्रविधिमैत्री, परिष्कृत र सहज बनाउन काठमाडौँ उपत्यकाको ७ वटा ट्राफिक कार्यालयहरूमा ट्राफिक नियम उल्लंघन गरेबापत चालकहरुले तिर्नुपर्ने जरिवाना रकम प्रभु–पेको किअस्क मेसिनको प्रयोग गरि भुक्तानी गर्न सकिने व्यवस्था विस्तार गरेको छ ।

यस अघि यो व्यवस्था महानगरीय ट्राफिक प्रहरी महाशाखामा चालु भैँसकेको र सोमबारदेखि मातहतका महानगरीय ट्राफिक प्रहरी प्रभाग गौशाला, महानगरीय ट्राफिक प्रहरी प्रभाग कोटेश्वर, महानगरीय ट्राफिक प्रहरी प्रभाग गठ्ठाघर, महानगरीय ट्राफिक प्रहरी प्रभाग थापाथली, महानगरीय ट्राफिक प्रहरी वृत्त मालीगाउँ र महानगरीय ट्राफिक प्रहरी प्रभाग दरबारमार्गमा विस्तार गरेको हो ।

महानगरीय ट्राफिक प्रहरी परिसर सातदोवाटोमा आयोजित एक कार्यक्रमका वीच महानगरीय ट्राफिक प्रहरी महाशाखाका प्रहरी बरिष्ठ उपरीक्षक उमेशराज जोशी र प्रभु–पेका अध्यक्ष कुसुम लामाले संयुक्त रुपमा रिबन काटी “प्रभु–पेको किअस्क मेसिन” उद्घाटन गरेका थिए ।

ट्राफिक नियम उल्लंघन गरेबापत सवारी प्रयोगकर्ताहरूले जरिवाना तिरी आफ्नो कागजपत्रहरु फिर्ता लिन सरल एवं सहज होस् भन्ने उद्देश्यले प्रभु बैंकको सहकार्यमा नयाँ प्रविधि मातहतका ७ वटा कार्यालयहरुमा विस्तार गरिएको एसएसपी जोशीले बताएका छन् ।