काठमाडौँ । नेपालमा पछिल्लो २४ घण्टामा ५ हजार ५८३ कोरोना संक्रमित थपिएका छन् ।

देशभरका विभिन्न प्रयोगशालामा १७ हजार ६७४ जनाको नमूना परीक्षण गर्दा ५ हजार ५८३ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार २४ घण्टामा १० हजार ७७६ जनाको पीसीआर परीक्षण गर्दा ३ हजार ६५७ जनामा र ६ हजार ८९८ जनाको एन्टिजेन परीक्षण गर्दा १ हजार ९२६ जनामा संक्रमण पुष्टि भएको हो ।

पछिल्लो २४ घण्टाको अवधिमा ९ जना कोरोना संक्रमितको मृत्यु भएको पनि मन्त्रालयले जनाएको छ । योसहित कोरोनाबाट मृत्यु हुनेको संख्या ११ हजार ७ सय ५२ पुगेको मन्त्रालयको अध्यावधिक विवरणमा उल्लेख छ ।

सोही अवधिमा ८ हजार २६७ जना कोरोनामुक्त भएको मन्त्रालयले जनाएको छ ।