काठमाडौं । प्रधानमन्त्री शेरवहादुर देउवा र नेकपा (माओवादी केन्द्र)का अध्यक्ष पुष्पकमल दाहाल (प्रचण्ड) वीच भेटवार्ता भएको छ । अमेरिकी आर्थिक परियोजना मिलेनियम च्यालेन्ज कम्प्याक्ट एमसीसी संसदमा पेश गर्ने नगर्ने विषयमा सत्तागठबन्धन दलका यी शीर्ष नेताहरुका वीचमा सहमति नजुटिरहेका बेला वुधबार साँझ प्रधानमन्त्रीको सरकारी निवास बालुवाटारमा भेटवार्ता भएको हो ।

प्रधानमन्त्रीसँगको भेटवार्ताका लागि प्रचण्ड साँझ ५ वजे बालुवाटार पुगेका थिए ।

दुई दिन देखि यी सत्तागठबन्धन दलका शीर्ष नेताहरुका वीचमा भेटवार्ता भएको थिएन । प्रधानमन्त्री देउवाले सभामुखमाथी दवाव बढाउने, प्रतिपक्षी एमालेको साथ र सहयोग लिने र आवश्यक परे गठबन्धन तोडेर भएपनि एमसीसी सम्झौता सदनमा लगेर पारित गर्ने योजना बनाईरहेका छन् ।

सोही कारण सत्तागठबन्धन दलकै वीचमा आशंका उब्जिरहेका बेला दुई गठबन्धन दलका नेताहरुका वीचमा भेटवार्ता भएको हो । भेटवार्ताका विस्तृत विवरण नखुलेपनि एमसीसी सम्झौता र स्थानीय तह निर्वाचनका विषयमा केन्द्रीत रहेर प्रधानमन्त्री देउवा र माओवादी अध्यक्ष प्रचण्डका वीचमा वार्ता भएको बताईएको छ ।

प्रधानमन्त्रीले गत माघ १६ मै संसदमा एमसीसी सम्झौता अगाडी वढाउन चाहेका थिए । त्यसपछि संसद वैठक माघ २६ सम्मलाई स्थगित भएको थियो । अहिले फेरि बैठक स्थगित भउर फागुन २ गतेका लागि बोलाईएको छ । अमेरिकाले फागुन १६ भित्र एमसीसी सम्झौता अनुमोदनका लागि सरकारलाई प्रेसर दिईरहेको छ ।

प्रधानमन्त्री एमसीसी पारित गर्न कम्मर कसेर लागेपनि माओवादी केन्द्र परिमार्जन विना जस्ताको तस्तै पारित गर्ने पक्षमा छैन । सत्ता गठबन्धन घटकको अर्काे दल नेकपा एकीकृत समाजवादी पनि माओवादीसँगै छ यो विषयमा । प्रचण्ड प्रधानमन्त्री देउवासँगको भेट अगाडी एकीकृत समाजवादीका अध्यक्ष माधव नेपालसँगको छलफलमा थिए । वुधबार विहान नेपाल प्रचण्ड भेटन प्रचण्डकै निवास खुमलटार पुगेका थिए ।

खुमलटारमा प्रचण्ड र नेपालका वीचमा झण्डै दुई घण्टा लामो सम्वाद भएको थियो । उक्त सम्वाद कर्णाली प्रदेश सरकार गठनमा नेकपा एसले जनाएको असन्तुष्टीका विषयमा केन्द्रीत रहेको भनिएपनि एमसीसी र स्थानीय तह निर्वाचनका विषयमा दुई पार्टीले बनाउने समझदारीमा केन्द्रीत रहेको बताईएको छ ।

नेपालसाग विहानको छलफलपछि साँझ प्रधानमन्त्रीसँग प्रचण्डको भेटवार्ता भएको हो ।

देउवाले पनि यस विषयमा आन्तरिक छलफल गरेका छन् । आफुसागै महाधिवेशनमा चुनावमा पराजित पार्टी नेता शेखर कोइरालासँगको छलफल पछि प्रधानमन्त्रीले प्रचण्डसाग भेट गरेका हुन् । कोइरालाले मंगलबार साँझ मात्र विपक्षी दलका नेता केपी ओलीसँग भेट गरेका थिए । त्यही भेटका बारेमा कोइरालाले प्रधानमन्त्रीलाई जानकारी समेत गराएका थिए ।

ओली सत्तागठवन्धन एमसीसीकै कारण टुटाउन चाहिरहेका छन् । यस्तो बेला राजनीतिक दलका वीचमा भईरहेको भेटघाट निक्कै अर्थपूर्ण मानिएको छ ।