काठमाडौं । सत्ता गठबन्धन दलका प्रमुख तीन दलका शीर्ष नेताहरुका वीचमा अमेरिकी अनुदान सहयोग परियोजना (एमसिसी)बारे छलफल भएपनि फेरि पनि सहमति जुटेको छैन । शनिवार प्रधानमन्त्रीको सरकारी निवास बालुवाटारमा प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधव नेपालका वीचमा छलफल भएको थियो ।

तर बैठक बिनानिष्कर्ष टुंगिएको छ । प्रधानमन्त्री देउवाले एमसिसीमा सहमति कायम गरी संसदवाट अनुमोदन गर्न फेरि पनि गरेको प्रयासमा माओवादी केन्द्रका अध्यक्ष प्रचण्ड र एकीकृत समाजवादीका अध्यक्ष माधव नेपालले सहमति जनाएनन । दुवै नेताले शंसोधन विना एमसीसी पारित गर्न नसकिने अडान फेरि दोहोराएका छन् ।

दुवै नेताले चुनाव अगाडी एमसीसी पारित गरेर जान नसकिने पूरानै धारणा आजको छलफलमा पनि राखेका छन् ।

झण्डै साढे दुई घण्ठा तीन नेताले छलफल गरेका हुन् ।

एमसिसीमा सहमति नजुटेपछि बैठक फेरि बस्नेगरी टुंगिएको छ । ‘आज बसेको बैठकमा कुनै निष्कर्ष निस्किएन, छलफल भएका छन् , सहमति निस्केको छैन । बैठक फेरि बस्ने कुरा भएको छ,’ प्रधानमन्त्रीका स्वकिय सचिव भानु देउवाले भने ।

प्रचण्डको सचिवालयले पनि प्रमुख तीन नेताको छलफलमा सहमति नजुटेको जनाएको छ ।

बैठकमा देउवाले फागुन २ को संसद बैठकमा एमसीसी संसदमा लैजाने प्रस्ताव गरेका थिए । तर प्रचण्ड र माधव नेपालले भने प्रतिनिधीसभाको वैठक सार्न आग्रह गरेको प्रचण्डको सचिवालयले जनाएको छ । प्रधानमन्त्री निवास बालुवाटारमा तीन शीर्ष नेताबीच भएको भेटवार्ताका क्रममा दुई गते हुने भनिएको संसद् अधिवेशन प्रमुख प्रतिपक्ष दल एमाले २ गते उपस्थित हुन नसक्ने र संसद् सार्न गरेको अनुरोधको कारण अध्यक्षद्वयले फागुन ४ गते राख्न सुझाव दिनु भएको छ , प्रचण्डको नीजि सचिवालयले जनाएको छ ।