काठमाडौँ । नेकपा एमालेभित्र युवा संघको विवाद चरम उत्कर्षमा पुगेको छ । युवा संघका इन्चार्ज एवं एमाले पोलिटब्युरो सदस्य नेता महेश बस्नेतले मनोमानी गरेको भन्दै संगठन विभागमा परेको उजुरीलाई विभागले उल्टाएपछि विवाद चरम उत्कर्षमा पुगेको हो ।

युवा संघले पोखरा बैठकले गरेको निर्णय उल्टाउन संगठन विभागले निर्देशन दिएपछि युवा संघका इन्चार्ज महेश बस्नेतले संगठन विभागका प्रमुखमाथि आक्रोस पोखेका छन् । विभागले निर्णय उल्टाउन निर्देशन दिएपछि इन्चार्ज बस्नेतले पार्टी अध्यक्ष केपी शर्मा ओलीसँग भेटका लागि समय मागेको र ओलीले समय नदिएपछि संगठन विभाग खगराज अधिकारीलाई सामाजिक सञ्जालमै गाली गर्न पुगेका छन् ।

उनले संगठन विभाग प्रमुख अधिकारीलाई जिम्मेवारीबाट हटाउन माग गरेका छन् । नेता अधिकारीमाथि संगठन विभाग चलाउन अयोग्य रहेको आरोप लगाउँदै उक्त जिम्मेवारीबाट मुक्त गर्नु पर्ने नेता बस्नेतले माग गरेका हुन् ।

आइतबार सामाजिक सञ्जालमार्फत् उनले पार्टी नेतृत्वसँग यस्तो माग गरेका हुन् । पार्टीको सचिवालय बैठकले जन संगठन संयोजन संयन्त्रले कार्यविधि पारित गरिसकेपछि त्यससँग बाझिने गरी केन्द्रीय कमिटी र पदाधिकारी बनाएको भन्दै अधिकारीप्रति बस्नेतले आक्रोश पोखेका हुन् ।

पार्टीको सचिवालयको बैठकले कार्यविधि पारित गरिसकेपछि त्यससँग बाझिने गरी केन्दीय कमिटी र पदाधिकारी बनाउन निर्देशन गर्ने अधिकार तपाईंलाई कसले दियो ? युवा संघले सचिवालयको अधिकारिक निर्णयबाट भएका फैसला र जिम्मेवारी पाएका साथीहरुलाई फरक निर्णय गर्ने जिम्मा कसले दियो ? संगठनको इन्चार्ज, अध्यक्ष समेतसँग परामर्श नगरी संगठनको बारेमा विभागको आडमा आदेश दिने न्यायपालिकीय अधिकार कसले दियो ? एमालेविरुद्ध चौतर्फी आक्रमण भइरहेको बेलामा आन्दोलनको मोर्चा सशक्त ढंगले सम्हालिरहेको युवा संघमाथि अराजकता हाबी हुने र विरोधीहरूको हौसला बढ्ने गरी फैसला किन गर्नु भयो ?’, इन्चार्ज बस्नेतले भनेका छन् ।

बस्नेतले संगठन विभाग अधिकारीलाई संगठन विभाग चलाउन अयोग्यको रहेको आरोप समेत लगाएका हुन् । ‘छोटो समयको अनुभवबाट भन्न सकिन्छ तपाईं संगठन विभाग चलाउन सक्ने व्यक्ति होइन् । तसर्थ खगराज अदिकारीलाई संगठनको जिम्मेवारीबाट तत्काल मुक्त गर्न पार्टी नेतृत्वसँग माग गर्दछु,’ उनले भनेका छन् ।

पोखरा बैठकमा सर्वसम्मतिको नाममा नेताहरुलाई हटाउने र राख्ने निर्णय गरेपछि उपाध्यक्ष रोशन बस्नेत,उर्मिला सुनुवार, रमेश तिवारी, अमित लामालगायतका पदाधिकारीको पार्टीको संगठन विभागमा उजुरी दिएका थिए । संगठन विभागले त्यसको छानबिन गरी पार्टी अध्यक्ष केपी ओली र महासचिव शंकर पोखरेललाई प्रतिवेदन बुझाएको थियो ।

सोही आधारमा पदाधिकारी बैठकले युवा संघले पोखरा बैठकबाट गरिएको निर्णय उल्टाउन संगठन विभागलाई निर्देशन दिएको र सो निर्देशन आइतबार युवा संघलाई पठाइएको थियो ।