काठमाडौँ । प्रमुख प्रतिपक्षी दल नेकपा एमालेले आज सोमबार संसदीय दलको बैठक बोलाएको छ । सत्ता गठबन्धन दलहरूले प्रधानन्यायाधीश चोलेन्द्र शमशेर जबराविरुद्ध संसदमा महाअभियोग प्रस्ताव दर्ता गरेसँगै एमालेले बैठक बोलाएको हो ।

बैठकमा एमालेले पार्टी अध्यक्ष केपी शर्मा ओली नेतृत्व सरकारले गरेको प्रतिनिधिसभा विघटनलाई पुनःस्थापना गर्ने र तत्कालीन नेपाल कम्युनिष्ट पार्टी (नेकपा)लाई खारेज गर्ने चार न्यायाधीशविरुद्ध महाभियोग प्रस्ताव दर्ता गर्नेबारे छलफल गर्ने भएको छ । यसका लागि आज एमालेले संसदीय दलको बैठक बोलाएको हो ।

गत वर्षमा २३ फागुन गते एमाले र नेकपा माओवादी केन्द्र एकीकृत भई गठन भएको नेकपा खारेज गर्ने फैसला सुनाउने चार वरिष्ठतम् न्यायाधीश दीपककुमार कार्की, मिराकुमारी खड्का, डा. आनन्दमोहन भट्टराई र ईश्वरप्रसाद खतिवडाविरुद्ध संसदमा महाअभियोग प्रस्ताव ल्याउने तयारीमा एमाले जुट्ने भएको हो । उनीहरूविरुद्ध महाअभियोग प्रस्ताव ल्याउन एमालेका सांसदहरूले हस्ताक्षर सुरु गरिसकेको बुझिएको छ ।

आइतबार बिहान प्रधानन्यायाधीश जबराविरुद्ध कांग्रेस, माओवादी केन्द्र र एकीकृत समाजवादीले महाअभियोग प्रस्ताव संसद सचिवालमा दर्ता गरेको छ । जसमा सत्ता गठबन्धन दलका ९८ जना सांसदहरूले हस्ताक्षर गरेका छन् ।

प्रधानन्याधीश जबराविरुद्ध महाअभियोग लगाउन गठबन्धन बहुमतमा भए पनि दुई तिहाई पुग्ने अवस्था छैन ।