काठमाडौँ । प्रधानन्यायाधीश चोलेन्द्र शमशेर जबरामाथि महाअभियोगको प्रस्ताव दर्ता भएसँगै कामु प्रधानन्यायाधीश दीपककुमार कार्कीले सर्वोच्च अदालतको पूर्ण बैठक बोलाएका छन् । आइतबार जबराविरुद्ध महाअभियोगको प्रस्ताव दर्ता भई निलम्बनमा परेपछि कामु प्रधानन्यायाधीश कार्कीले सोमबार अपराह्न २ बजे बस्ने गरी पूर्ण बैठक बोलाएका हुन् ।

बैठकमा अदालतका सम्बन्धमा विकसित पछिल्लो घटना, र अदालत सञ्चालन तथा न्यायपालिका सुधारबारेमा छलफल हुने भएको छ । बैठकमा न्यायपालिका सुधारका लागि न्यायाधीश हरिकृष्ण कार्की सम्मिलित समितिले दिएको प्रतिवेदन पूर्णतः कार्यान्वयन गर्नेबारेमा समेत छलफल हुने बताइएको छ ।

प्रधानन्यायाधीश जबराविरुद्ध महाभियोग लागे पनि उनको पूर्ण बहिर्गमन नहुँदासम्म नेपाल बारले आन्दोलन जारी राख्ने बताउँदै आएको छ । यद्यपि, नेपाल बार एसोसिएसनले अदालतको काम कारबाहीमा बाधा नपुर्याउने बताएको छ ।