काठमाडौं । सभामुख अग्निप्रसाद सापकोटाले अमेरिकी सहयोग परियोजना एमसीसीबारे लचिलो बनेका छन् ।

सभामुख सापकोटाले बोलाएको सर्वदलीय बैठकमा उनले दलहरुबीच सहमति भएमा एमसीसी अघि बढाउने बताए ।

सर्वदलीय बैठकमा भने सभामुख सापकोटाले दलहरुबीच सहमति भए आफूले एमसीसी नरोक्ने स्पष्ट गरे । तर दलहरुबीच सहमति हुनुपर्ने उनको भनाई थियो ।

उनले संसदमा आफू अम्पायर मात्रै रहेको उल्लेख गरे । एमसीसी संसदमा टेबल हुनै नदिएर सभामुख सापकोटाले संसद बैठक स्थगित गर्दै आएको आरोप लाग्दै आएको थियो ।

सर्वदलीय बैठकमा नेताहरुबीच एमसीसी र संसद्को अवरोध खुलाउने विषयमा छलफल भएको थियो ।

सोमबारको बैठक विशेष भएको र संसद्को अवरोध हटाउने विषयमा नेताहरूले पहल गर्ने पनि उनले उल्लेख गरे ।

प्रमुख प्रतिपक्ष दल एमालेलाई समेत सहमतिमा ल्याएर संसद सूचारु गराउन सरकार र सत्तारुढ दलहरुले गम्भिर पहल गर्ने महत्वपूर्ण सहमति गरिएको सभामुख सापकोटाले जानकारी दिए ।

संसदमा विचाराधिन नागरिकतासँग सम्बन्धित विधेयक, हवाई उडानसँग सम्बन्धित विधेयकलगायतका जनसरोकारका विधेयकहरु पारित हुने वातावरण बनाउन आफूले प्रधानमन्त्री शेरबहादुर देउवा र दलका नेताहरुको ध्यानाकर्षण गराइएको उनले बताए ।

सर्वदलीय बैठकमा प्रमुख प्रतिपक्षी दल नेकपा एमालेको भने अनुपस्थिति रहेको थियो ।

सभामुख सापकोटाले अब संसद् सुचारु हुने पनि विश्वास ब्यक्त गरेका छन् । पछिल्लो समय सत्ता गठबन्धन दलहरुले प्रधानन्यायाधीस चोलेन्द्र शम्शेर जबरामाथि महाअभियोग लगाएपछि राष्ट्रिय राजनीति पेचिलो बनेको छ ।

प्रधानन्यायाधीसमाथि महाभियोग लगाएपछि एमालेले सर्वोच्चका चार न्यायाधीस र सभामुखमाथि महाभियोग लगाउन सक्ने चर्चा चलिरहँदा सभामुख सापकोटा एमसीसीप्रति लचिलो बनेका छन् ।