काठमाडौं । नेपाली काँग्रेसले भ्रातृ संगठनहरु विघटन भएका छन् । मंगलबार बसेको काँग्रेस केन्द्रीय कार्यसम्पादन समिति बैठकले म्याद सकिएका भ्रातृ संगठनहरुको म्याद नथप्ने निर्णय गरेसँगै विघटन भएका हुन् ।

कांग्रेसका भातृ संस्था तरूण दल, नेविसंघ, नेपाल प्रजातन्त्र सेनानी संघ, राष्ट्रिय लोकतान्त्रिक अपांग संघ, नेपाल किसान संघ, नेपाल दलित संघ, नेपाल आदिवासी जनजाती संघ, नेपाल तामाङ्ग संघ, नेपाल ठाकुर समाज लगायतका भ्रातृ संगठनहरुको म्याद गत साउन ३१ मा ६ महिना थप गरिएको थियो । ६ महिना थपिएको म्याद पनि माघ ३१ गते सकिएको थियो ।

अधिकांश भातृ संस्थाका अध्यक्षहरु पार्टीको हालै सम्पन्न १४ औं महाधिवेशनबाट पार्टी केन्द्रीय सदस्यमा निर्वाचित भइसकेका छन् ।

काँग्रेसका १३ भ्रातृ संगठन र १८ वटा शुभेच्छुक संस्थामध्ये अधिकांशको म्याद सकिएको थियो ।

भंग गरिएका भ्रातृ संस्थामा नयाँ कमिटी ल्याइने भएको छ । कार्य सम्पादन समितिले नयाँ कमिटी ल्याउने अधिकार पार्टी सभापतिलाई दिएको छ ।