काठमाडौं । प्रतिनिधिसभाको बुधबारका लागि तय भएको बैठकमा सरकारका तर्फबाट अमेरिकी सहयोग परियोजना एमसीसी प्रस्ताव पेश गर्न लागिए पनि सभामुखको कार्यसूचीमा परेको छैन ।

संघीय संसद सचिवालयले मंगलबार टाँसेको बुधबार बस्ने संसद बैठकको सम्भावित कार्यसूचीमा संविधानसभा र राष्ट्रियसभा सदस्यको निधनमा शोक प्रस्ताव मात्रै समावेश गरिएको छ ।

संघीय संसदको महासचिव डा. भरतराज गौतमले दिएको बुधबार १ बजेका लागि तय गरिएको संसदको बैठकमा तीन वटा शोक प्रस्तावको सम्भावित कार्यसूची उल्लेख गरेका छन् ।

कांग्रेस संसदीय दलको आजको बैठकले एमसीसी पेश गर्ने निर्णय गरिसकेको छ ।

सभामुख अग्निप्रसाद सापकोटाले बुधबार दिउँसो १ बजेको संसद बैठकअघि विहान ११ः ३० बजेका लागि प्रतिनिधिसभा कार्य ब्यवस्था परामर्श समितिको बैठक बोलाएका छन् । नयाँ बानेश्वरस्थित संसद भवनको शंकर हलमा परामर्श समितिको बैठक बस्नेछ । कार्यब्यवस्था परामर्श समितिको बैठकले एमसीसीबारे तय गर्न सक्ने बताइएको छ ।

यसैबीच संसदको नवौं अधिवेशनदेखि नै संसद वैठक अवरुद्ध गर्दै आएको नेकपा एमालेले भोलिको प्रतिनिधिसभा बैठकमा सहभागी हुन आफ्ना सबै सांसदलाई आह्वान गरिसकेको छ ।