काठमाडौं । अमेरिकी सहयोग परियोजना एमसीसीविरुद्ध ६ वटा कम्युनिस्ट पार्टीले मंगलबार साँझै काठमाडौंसहित देशैभर मशाल जुलुस प्रदर्शन गरेका छन् ।

बुधबार प्रतिनिधिसभा बैठकमा एमसीसी प्रस्ताव टेबल गर्ने तयारी गरिएपछि विप्लव, मोहन वैद्य, ऋषि कट्टेल, आहुती, कर्णजीत बुढाथोकी नेतृत्वको पाँच कम्युनिस्ट पार्टी र सीपी गजुरेल नेतृत्वको देशभक्त जनगणतान्त्रिक मोर्चाले बुधबार नेपाल बन्दको आह्वान गरेका छन् ।

बन्द आह्वान गरिएको पूर्व सन्ध्यामा देशैभर मशाल जुलुस प्रदर्शन गरिएको मोर्चाका अध्यक्ष सीपी गजुरेलले बताए ।

बन्द सफल बनाउन भन्दै नेपाल बन्दको पूर्व सन्ध्यामा मंगलबार बेलुका चितवनको लायन्सचोकबाट पुल्चोकसम्म मशाल जुलुस निकालेको मेरोन्यूजकर्मीले जानकारी दिए ।

एमसीसीविरुद्ध ६ पार्टीले बुधबार सशक्त र जुझारु नेपाल बन्द गर्ने बताएका छन् ।

गृह मन्त्रालयले मंगलबार नै सबै जिल्ला प्रशासनलाई सर्कुलर गरी मशाल जुलुस बन्द जस्ता कार्यक्रम गर्न नदिन निर्देशन दिए पनि अधिकांश जिल्लामा मंगलबार बेलुका मशाल जुलुस निकालेका छन् ।

गृह मन्त्रालयले विभिन्न ६ दलले एमसीसीको विरोधमा बन्दको आह्वान गरेपछि शान्ति सुरक्षा कायम गर्न मातहतका निकायलाई सर्कुलर गरेको थियो ।

नेपाल कम्युनिस्ट पार्टी लगायतका ६ वटा राजनीतिक दलले फागुन ३ गते साँझ मशाल जुलुस प्रदर्शन गर्ने र फागुन ४ गते नेपाल बन्दको आह्वान गरेको भनी सूचना प्राप्त भएकोले कुनै पनि गतिविधि हुन नदिन भन्दै गृहमन्त्रालयले सबै जिल्ला प्रशासनलाई सर्कुलर गरेको थियो ।

सुरक्षा संयन्त्रले उच्च सतर्कता र निगरानी बढाइ जिल्लाको समग्र शान्ति सुरक्षा र सुब्यवस्थालाई चुस्त दुरुस्त बनाउन गृहले मातहतका निकायलाई आदेश दिएको छ ।

गृहकाे सर्कुलर