पोखरा । गण्डकी प्रदेशका प्रदेश प्रमुख पृथ्वीमान गुरुङले प्रदेश सरकार मार्फत् जनताको अपेक्षा अनुसारको धेरै कामहरु हुन बाँकी रहेको बताएका छन् ।

बुधवार गण्डकी प्रदेश सरकारको चौथो वार्षिकोत्सव समारोहलाई सम्बोधन गर्दै प्रदेश प्रमुख गुरुङले जनताको अपेक्षा अनुसारको काम प्रदेश सरकारमार्फत् हुनै बाँकी रहेको बताएका हुन् ।

यद्यपी, प्रदेश सरकारमार्फत् ऐन, कानूनको निर्माण हुनुका साथै विकास र समृद्धिको कामको भने सुरुवात भएको उनले बताए ।

उनले संघियताको संस्थागत बिकासका लागि प्रदेश र स्थानिय तहको जग बलियो हुनुपर्ने बताए ।

प्राप्त उपलब्धिको रक्षाका लागि सबै पक्ष एकजुट हुन पनि उनले आग्रह गरे ।

त्यसैगरी कार्यक्रममा बोल्दै गण्डकी प्रदेशका मुख्यमन्त्री कृष्णचन्द्र नेपाली पोखरेलले गण्डकी प्रदेशमा सत्तापक्ष र प्रतिपक्षबीच द्वन्द्व नभई विशुद्ध राजनीतिक प्रतिस्पर्धा रहेको बताए ।

उनले प्रदेशको राजनीति परिपक्व, लोकतान्त्रिक र जनउत्तरदायी भएको उल्लेख गरे ।

मुख्यमन्त्री पोखरेलले प्रदेश स्थापना भएको छोटो समयमा नै सरकारले जनताको मन जित्न सफल भएको दाबी गरे ।

सरकारले गरेका बिकास, निमार्ण तथा सेवा प्रवाहले प्रदेश सरकारको महत्व जनताले आत्मसात् गरेको उनले बताए ।

उनले संविधानले प्रदेशलाई दिएको जिम्मेवारी पूरा गर्नका लागि पर्याप्त अधिकार उपयोग गर्न नपाएको पनि बताए ।