काठमाडौं । सत्ता गठबन्धनमा आबद्ध पाँच दलका नेताहरूको आजको बैठकमा एमसीसीका विषयमा छलफल भएको छ । गठबन्धनको अर्को बैठक यही फागुन ८ गते बस्ने सहमति भएको आजको बैठक सकिएको सरकारका प्रवक्ता एवं सञ्चार तथा सूचना प्रविधिमन्त्री ज्ञानेन्द्रबहादुर कार्कीले बताए ।

कार्कीले अमेरिकी सहयोग परियोजना (एमसीसी)लाई संसद्मा प्रवेश गराएर निष्कर्षमा पुर्‍याउने विषयमा आजको बैठकमा छलफल भएको जानकारी दिए ।

आजको संसद् बैठकमा एमसीसी टेबल हुने/नहुने भन्ने विषयमा कार्यव्यवस्था परामर्श समितिको बैठकमा छलफल हुने उनले बताए ।

उनलेभने,‘अर्को बैठक ८ गते बिहान १० बजे बसेर यसलाई निर्णयमा पुर्‍याउँछौँ।’

संसदको अवरोध हटाउन प्रधानमन्त्री देउवा बिहीबार राति प्रमुख प्रतिपक्षी नेकपा (एमाले) का अध्यक्ष केपी शर्मा ओलीलाई भेट्न गएको उनले बताए ।