काठमाडौँ । गेटवे पेमेन्ट सर्विस प्रालिमा आबद्ध तथा मोबाइल प्रविधिमा आधारित युनिफाइड पेमेन्ट इन्टरफेस नेपाल (युपिआई नेपाल) सञ्चालनका लागि भारतस्थित एनपीसिआई इन्टरनेसनल तथा मनम इन्फोटेकबीच सम्झौता भएको छ ।

सम्झौतासँगै अब विभिन्न बैंक तथा वित्तीय संस्था, भुक्तानी सेवा प्रदायक तथा भारतबाट विभिन्न भुक्तानी सेवा प्रदायकमार्फत नेपालको कुनै पनि बैंक खाता वा वालेटमा रकमान्तर गर्न सक्ने व्यवस्था हुने भएको छ । यस्तै, दुई देशबीचका नागरिकले जहाँसुकैबाट रकम तिर्न सक्ने व्यवस्था गरिएको छ ।

उक्त सम्झौतामा नेपालका कम्पनीका अध्यक्ष कमलनाथ प्रधान र भारतका एनपीसिआईका तर्फबाट प्रमुख कार्यकारी अधिकृत रितेश शुक्ला तथा डिजिटल बैंकिङ तथा भुक्तानी सेवामा लामो अनुभव रहेको भारतीय फिन्टेक कम्पनी मनम इन्फोटेकका तर्फबाट निर्देशक नागाबाबु रामिनेनीले हस्ताक्षर गरेका थिए ।