चितवन । अमेरिकी सहयोग परियोजना एमसीसी खारेजीको माग गर्दै चितवनमा जिल्ला प्रशासन कार्यालय घेराउ भएको छ ।

एमसीसी खारेजीको माग गर्दै ६ कम्युनिस्ट पार्टी र दुई मोर्चाले आइतबार देशैभरका जिल्ला प्रशासन घेराउको कार्यक्रम राखेका थिए ।

प्रशासन कार्यालय घेराउको कार्यक्रम अन्तर्गत तीन दलहरुले आज जिल्ला प्रशासन कार्यालय चितवन घेराउ गरेका हुन् ।

प्रशासन घेराउ कार्यक्रममा बोल्दै नेकपा (क्रान्तिकारी माओवादी)का केन्द्रीय सदस्य एवम् जिल्ला इन्चार्ज घननाथ सापकोटाले एमसीसी पास गर्ने धृष्टता संसदीय दलहरुले गरेमा जनताले प्रतिवाद गर्ने बताए ।

यस्तै, नेकपाका सेक्रेटरी मीनप्रसाद सापकोटाले प्रहरी दमनमा उत्रिएमा पहिलो निशाना हुने बताउँदै एमसीसी संसदबाट पास भए सांसदहरूलाई सामाजिक बहिष्कार गरिने बताए ।

यस्तै, नेकपा मसालका जिल्ला प्रवक्ता मेघराज ढकालले एमसीसी सम्झौता राष्ट्रघाती भएको भन्दै कुनै पनि हालतमा संसदबाट पास गर्न नहुनेमा जोड दिए ।