काठमाडौं । २०६२/०६३ सालको जनआन्दोलनका बेलाका चर्चित नेतृ हुन् – रामकुमारी झाँक्री । उनी अहिले कांग्रेस सभापति शेरवहादुर देउवा नेतृत्वको सरकारका शहरी विकास मन्त्री पनि छिन् ।

सधै जसो सडक आन्दोलनको हिमायति र पार्टी नेतृत्वको समेत गलत रवैयाको विरोधमा खुलेरै आलोचनामा उत्रन सक्ने नेतृको रुपमा उनको पहिचान थियो । तत्कालिन नेकपा कालमा उनी केपी ओलीको चर्काे आलोचक थिइन् । ओलीले दुई –दुई पटक संसद विघटन गरेपछि उनी फेरि एकपटक सडक आन्दोलनकी ‘वाघिनी’ कै रुपमा देखिएकी थिइन ।

ओली प्रधानमन्त्री रहेका बेला नेकपाभित्रको अन्तरकलह चुलिरहँदा गोरखामा आयोजित एक कार्यक्रममा राष्ट्रपति विद्यादेवी भण्डारीलाई व्यक्तिगत रुपमा चरित्रहत्या गर्ने ढंगले र एकल महिलाप्रति लक्षित गरेर आपत्तिजनक अभिव्यक्ति दिएको अभियोगमा प्रहरीले झाँक्री पक्राउ समेत परेकी थिइन् ।

त्यसपछि झन उनको चर्चाको शिखर चुलिएको थियो ।

जव नेकपाको एकता टुटट्यो, त्यसपछि पनि नेकपा एमाले पार्टी विभाजित बन्यो । उनी माधव नेपाल नेतृत्वको नेकपा एकीकृत समाजवादीको नेतृ बन्न पुगिन । देउवाको नेतृत्वमा कांग्रेस, माओवादी केन्द्र, नेकपा एकीकृत समाजवादी, जनता समाजवादी देखि राष्ट्रिय जनमोर्चासम्मको सत्ता गठबन्धन निर्माण भयो ।

त्यसपछि उनी नेकपा एकीकृत समाजवादीको तर्फबाट शहरी विकास मन्त्री बनिन । मन्त्री बनेपछि भने झाँक्रीको विगत र अहिलेको ब्यवहार फरक देखिन थालेको उनकै पार्टीका जनवर्गीय संगठनकै नेताहरुले आरोप लगाउन थालेका छन् ।

पछिल्लो पटक उनी एमसीसी सम्झौताका विषयमा आफुले दिएको अभिब्यक्तिका कारण पार्टीभित्रै निशानामा परेकी छिन् ।

नेकपा एसनिकट विधार्थी संगठन अनेरास्ववियूका अध्यक्ष सुदेश पराजुलीले सार्वजनिकरूपमै मन्त्री झाँक्रीलाई मन्त्री पदले विक्षिप्त बनाएको टिप्पणी गरेका छन् । ‘रामकुमारी झाँक्रीलाई मन्त्री पदले विक्षिप्त बनायो । झाँक्रीलाई सरकारमा बसेर पार्टी नीति विपरित बोल्न छुट छैन । यदि हाम्रा मन्त्रीहरू अमेरिकी डलरमा बिकेका हुन् भने तिनीहरूलाई सरकारबाट फिर्ता बोलाइनुपर्छ ।’ सुदेशले सार्वजनिक रुपमै मन्त्री झाँक्रीको चर्काे आलोचना गदै भने ।

सुदेश मात्रै होइन, झाक्रीको अभिब्यीक्त र कार्यशैलीका विरुद्ध नेकपा एसको जवस मोर्चाका अन्य नेताहरु पनि बोलेका छन् ।

युवा संघका अध्यक्ष नरेश शाही, समाजवादी प्रेस संगठनका अध्यक्ष शम्भु श्रेष्ठ सम्मले पनि झाक्रीको भूमिका सन्देहपूर्ण रहेको भन्दै उनलाई पार्टीले यस्तै भूमिका खेले कारवाही गर्नुपर्ने धारणा राखेका छन् । त्यसपछि पार्टीको जवस मोर्चा संगठनको बैठकले मन्त्री झाँक्रीलाई सचेत गराउने निर्णय नै औपचारिक रुपमा गरेको छ ।

झाक्री एमसीसीको पक्षमा पार्टीभित्र लविङ्गमा लागिरहेकी छिन् । बुधबार मात्रै पनि उनले स्वाथ्यमन्त्री विरोध खतिवडाको निवासमा एकीकृत समाजवादीका मन्त्रीहरुको बैठक नै बोलाउन लगाएर एमसीसीको पक्षमा लविङ्ग गरेकी थिइन् ।

पार्टीका आफ्नै मन्त्रीहरु एमसीसीका पक्षमा भित्रभित्र लविङमा लाग्न थालेपछि अध्यक्ष माधव नेपालले मन्त्रीहरुलाई पार्टीसँग परामर्श गरिराख्न सुझाएका थिए ।

गत सोमबार मात्रै अध्यक्ष नेपालले मन्त्री झाक्री, प्रेम आले, किसन श्रेष्ठसँग पार्टी कार्यालयमा छलफल गरेका थिए । स्वास्थ्यमन्त्री विरोध खतिवडा भने विरगञ्ज र हेटौडाका कार्यक्रममा रहेका कारण काठमाडौंमा नरहेकोले उक्त छलफलमा उनी भने सहभागी थिएनन ।

तर मन्त्री झाक्रीले फेरि पनि भित्रभित्र एमसीसीको पक्षमा लविङ्ग जारी नै राखिन् । उनले पार्टीले एमसीसीको पक्षमा कुनै पनि सांसदलाईृ ह्वीप लगाउन नहुने र सवैलाई स्वतन्त्र मत राख्न दिनुपर्ने र यसैका आधारमा सरकारको विषयमा कुनै निर्णय लिनु नहुने वताउँदै आएकी थिइन् ।

चितवनमा वुधबार एक कार्यक्रम र संसदबाट बाहिरिँदै गर्दा गत फागुन ८ गते मन्त्री झाँक्रीले एमसीसीको विषयमा दोहोरो नीति लिन नहुने भन्दै पक्षमा खुल्ने गरी सार्वजनिक अभिब्यक्ति दिएकी थिइन् ।

त्यसपछि पनि झाँक्रीकै पहलमा हिजो वुधबार साँझ स्वास्थ्यमन्त्री विरोध खतिवडाको निवासमा नेकपा एकीकृतबाट सरकारमा सहभागी हुने मन्त्रीहरुको छुटटै बैठक बोलाउन भूमिका खेलिन । झाँकी, प्रेम आले लगायतको आग्रहमा मन्त्री खतिवडाले सवै मन्त्रीलाई आफनै क्वार्टरमा बोलाएर बुधबार राती छलफल गरेका थिए ।

उक्त छलफलमा मन्त्री झाँक्रीले एमसीसीका विषयमा पार्टीले कसैलाई पनि ह्वीप नलाउने र सवैले आ आफनो स्वतन्त्र धारणा राख्न पाउने गरी जानुपर्नेमा लविङ्ग गरेकी थिइन् । अहिले सरकार छोडनै नहुने र सरकारमा मन्त्री रहेकाले भने सरकारको प्रस्तावको पक्षमा उभिने गरी धारणा बनाउनु पर्ने बताएकी थिइन ।

झाँकीको यस्तो सक्रियता नेकपा एसले रुचाईरहेको थिएन । यही वुझेर सम्मानित नेता झलनाथ खनालले विहिबार विहान माओवादी र जसपाका शीर्ष नेताहरुको सिंहदरवारको छलफल पछि नेकपा एकीकृतले विपक्षमा मतदान गर्ने र त्यसका लागि पार्टीले ह्वीप लगाउने बताएका थिए ।

त्यसपछि एकीकृत समाजवादीको मोर्चा संगठनले पनि मन्त्री झाँक्रीलाई पार्टी निर्णय विपरीत अभिव्यक्ति नदिन सचेत गराउने निर्णय गरेको हो । मन्त्री झाँक्रीलाई सार्वजनिक अभिव्यक्ति दिँदा ध्यान पुर्‍याउन सचेत गराउने निर्णय भएको जवस मोर्चाका एक नेताले मेरोन्यूजलाई बताए ।

‘अरु मन्त्रीहरुबारे पनि छलफल भएको छ । तर रामकुमारी झाँक्रीले लगातार पार्टी लाइन विपरीत अभिव्यक्ति दिइरहनुभएकाले सचेत गराउने निर्णय भएको छ’, ती नेताले भने । मोर्चा संगठनको प्रमुख उपमहासचिव विजय पौडेल छन् । नेकपा एसको मोर्चा संगठनको निर्णयकै आधारमा फागुन १ देखि नेकपा एकीकृत समाजवादी एमसीसीको विरोधमा अहिले सडक आन्दोलनमा उत्रेको छ ।