काठमाडौं । सरकारको नेतृत्व गरिरहेको दल नेपाली कांग्रेस र एमालेका नेताहरुवीच फेरि भेटवार्ता शुरु भएको छ । प्रधानमन्त्री शेरवहादुर देउवा सहित कांग्रेसका शीर्ष नेताहरुले दिउँसो बानेश्वरस्थित संसद भवनमै रहेको एमाले अध्यक्ष केपी शर्मा ओलीको च्याम्बरमा ओलीसहितका नेताहरुसँग सम्वाद गरेको थियो ।

प्रधानमन्त्री देउवाले एमसीसी पारित गर्न सहयोग गर्ने शर्तमा एमाले माग सम्वोधन गर्न आफु लचिलो हुने बताएपछि साँझ बालुवाटारमा फेरि छलफलमा बस्ने निधो भएको थियो । त्यही निधोका वीच अहिले फेरि प्रधानमन्त्री देउवा र ओली सहित कांग्रेस र एमालेका नेताहरुको प्रधानमन्त्रीको सरकारी निवास बालुवाटारमा भेटवार्ता शुरु भएको हो ।

बालुवाटार बार्तामा एमालेका वरिष्ठ उपाध्यक्ष ईश्वर पोखरेल , उपाध्यक्ष विष्णु पौडेल र सुवास नेम्वाङ सहभागी छन् । त्यस्तै कांग्रेसवाट प्रधानमन्त्री देउवा,, महामन्त्री गगन थापा , उपसभापति पूर्णवहादुर खडका, सञ्चारमन्त्री ज्ञानेन्द्रवहादुर कार्की पनि सहभागी भएका छन् ।

एमाले मागका आधारमा सभामुख अग्नि सापकोटालाई हटाउने विषयमा कांग्रेस र एमालेवीच छलफल हुने बताईएको छ । त्यस्तै केही प्रदेश सरकारमा एमालेले मुख्यमन्त्रीमा आउने र संघीय सरकारमा एमालेको सहभागिता हुने नहुने विषयमा पनि अहिलेको बैठकमा छलफल हुन लागेको छ । छलफल निर्णायक बने एमालेले गत भदौं २३ देखि जारी राखेको संसद अवरोध खुलाउने छ । एमसीसीमा प्रधानमन्त्रीलाई एमालेले सहयोग गर्नेछ ।