काठमाडौँ । सत्तारुढ दल नेपाली कांग्रेसले प्रमुख प्रतिपक्षी दल नेकपा एमालेको माग सम्बोधन गर्नेबारे छलफल थालेको छ । स्रोतका अनुसार प्रधानमन्त्री निवास बालुवाटारमा शुक्रबार एमालेको माग सम्बोधन गर्नेबारे छलफल गरेको हो ।

प्रधानमन्त्री शेर बहादुर देउवाले जसरी भए पनि अमेरिकी सहयोग परियोजना मिलिनियम च्यालेञ्ज कर्पोरेशन (एमसीसी) संसदबाट पास गराउने भन्दै एमालेसँग साथ मागेका थिए । बिहीबार प्रधानमन्त्री देउवाले प्रतिनिधिसभा बैठक स्थगित गराएर एमाले अध्यक्ष केपी शर्मा ओलीसँग छलफल गरेका थिए ।

छलफलमा एमाले अध्यक्ष ओलीले प्रधानमन्त्री देउवालाई आफ्नो माग सम्बोधन गरे एमसीसी पास गराउन साथ दिने वचन दिएका थिए । ओलीको वचनसँगै प्रधानमन्त्री देउवाले आज बिहानै एमालेको माग सम्बोधन गर्न भन्दै छलफल थालेका हुन् ।

एमालेले विगत छ महिनादेखि प्रतिनिधिसभा बैठक अवरोध गर्दै आएको छ । आफूहरूले कारबाही गरेको माधवकुमार नेपालसहित १४ सांसदलाई पदबाट बर्खास्त गर्नु पर्ने वा सभामुख अग्निप्रसाद सापकोटाको विकल्प खोज्न एमालेले माग राख्दै आएको छ ।

सोही विषयबारे छलफल गर्न प्रधानमन्त्रीले पार्टीका शीर्ष नेताहरूलाई बैठकमा बोलाएका हुन् । सत्ता साझेदारी दल नेकपा माओवादी केन्द्र र नेकपा एकीकृत समाजवादीले यथास्थितिमा संसदबाट एमसीसी पास गर्न नसक्ने अडान लिएसँगै कांग्रेसका नेताहरूले एमालेसँग सहकार्य गरी अगाडि जाने बताउँदै आएका थिए ।

यसैबीच, आजै सत्ता गठबन्धन दल नेकपा माओवादी केन्द्रसहित दलहरू आफ्नो पार्टीको बैठकमा जुटेको छ । सोही क्रममा माअ‍ोवादीले एमसीसी र सरकार छाड्नेसम्मको विषयमा छलफल गर्ने भएको छ ।

यस्तै, सत्ता गठबान्धन दल जनता समाजवादी पार्टी (जसपा)को बैठक बस्ने भएको छ । बैठकमा एमसीसीसहित आगामी निर्वाचनबारे छलफल गर्ने भएको छ ।