काठमाडौं । नेकपा (माओवादी केन्द्र)ले पार्टी केन्द्रीय समिति बैठक बोलाएको छ । फागुन २० गते पार्टी केन्द्रीय समितिको बैठक बोलाईएको केन्द्रीय कार्यालयका सचिव श्रीराम ढकाल प्रशान्तले जानकारी दिए ।

बैठक राष्टिय सभा गृहमा विहान ११ बजेदेखि शुरु हुनेछ । २० फागुन देखि २२ गते सम्म बैठक चल्ने जानकारी केन्द्रीय सदस्यहरुलाई गराइएको छ । बैठकमा समसामायिक राजनीति, एमसीसीले पार्टीभित्र निम्ताएको विवाद, पदाधिकारी चयन, केन्द्रीय समितिको पूर्णता देखि पार्टीका नेताहरुको कार्यविभाजन सम्मका एजेण्डामा केन्द्रीत रहेर छलफल हुने भएको छ ।

माओवादीको पुस ११ देखि १८ सम्म सम्पन्न भएको महाधिवेशनले पार्टी अध्यक्षमा प्रचण्डलाई चयन गरेपनि अन्य पदाधिकारी चयन गर्न सकेको छैन । पार्टी महासचिवका आकाक्षीमा सहमति जुटाउन नसक्दा पटक पटक माओवादी केन्द्रको केन्द्रीय समितिको बैठक बोलाइने र अन्तिम समयमा स्थगित हुँदै आईरहेको थियो ।

माओवादीमा पछिल्लो पटक एमसीसी सम्झौता सदनबाट अनुमोदनको विषयमा पनि चर्काे विवाद छ । वरिष्ठ नेता नारायणकाजी श्रेष्ठले एमसीसी संसदवाट अनुमोदन गर्ने कार्यमा पार्टी लागेको र अनुमोदन गराएको विषय पार्टीको महाधिवेशनको म्यान्डेट विपरित रहेको भन्दै अध्यक्ष प्रचण्डसँग असन्तुष्टि राख्दै आएका छन् । श्रेष्ठ र प्रचण्डका वीचमा विवाद चर्काे परेका कारण यो केन्द्रीय समिति बैठकलाई निक्कै चासोका साथ हेरिएको छ ।