काठमाडौं । अमेरिकी सहयोग नियोग मिलेनियम च्यालेन्ज कर्पाेरेसन (एमसीसी) सम्झौता सदनबाट अनुमोदन गरेको विराेधमा सोमबार संसद भवन अगाडि प्रेसर कुकर बीच सडकमै राखियो । सडकमा ‘नो एमसीसी’ भन्दै राखिएको कुकर राखिएपछि बम भएको आशंकामा झण्डै दुई घण्टा सडक अवरुद्ध हुन पुगेको थियो ।

त्यसपछि सेनाको बम डिस्पोजल टोलीले डिस्पोजल गर्दा कुकरमा इँटाको टुक्रा र कागज भेटिएको थियो ।

उक्त बीच सडकमा कुकर कसले राखिएको विषयमा प्रहरीको अपराध महाशाखा ले गम्भिर छानविन थालेको थियो । त्यसपछि प्रहरीले एक जनालाई शंकामा पक्राउ गरेको थियो ।

उनले पनि आफूले राखेको स्वीकार गरेको अपराध महाशाखाका प्रमुख एसएसपी वसन्त कुँवरले जानकारी दिएका छन् । उनका अनुसार यसरी पक्राउ पर्नेमा काभ्रेका सुवास महत हुन् । उनी विप्लवका कार्यकर्ता भएको प्रहरीले जनाएको छ।

काभ्रे भुम्लु गाउँपालिका–२ सिमथलीका सुवास महत विप्लवको पार्टीको विद्यार्थी संगठन अनेरास्ववियु क्रान्तिकारीको पशुपति बहुमुखी क्याम्पस कमिटीका अध्यक्ष पनि हुन् ।