काठमडाौँ । हाशिवरात्रिको अवसरमा लगाइएको मेलामा झगडा हुँदा एक जनाको मृत्यु भएको छ । पोखरा २० मौजामा स्थानीय युवाले मेला आयोजना गरेका थिए ।

उक्त मेलामा मदिरा सेवन गरी गाउँकै युवाबीच झगडा भएको थियो । झगडामा स्थानीय ३५ वर्षका चोकबहादुर गुरुङको मृत्यु भएको प्रहरीले जनाएको छ ।

घटनाको आरोपमा आरोपमा कास्की प्रहरीले निशान गुरुङ, प्रकाश गुरुङसहित तीन जनालाई पक्राउ गरेको छ । पीडित परिवारको किटानकै आधारमा उनीहरूलाई विभिन्न ठाउँबाट पक्राउ गरिएको कास्की प्रहरी प्रवक्ता डीएसपी सुन्दर तिवारीले जानकारी दिए ।

‘घटना हुने वित्तिकै भागिरहेको अवस्थामा दुई जनालाई चक्कुसहित पक्राउ गरेका हौँ, अर्का एक जना आज समातिएका छन्,’ उनले भने, ‘अनुसन्धान जारी छ । बाँकी अनुसन्धानपछि खुल्छ ।’

गाउँकै दुई युवाबीच झगडा भइरहेको बेला चोकबहादुर बीचमा परेको प्रत्यक्षदर्शीको भनाई छ । ‘चोकबहादुर घटनामा थिएनन्, अरुको बीचमा उनी परेका हुन्,’ एक प्रत्यक्षदर्शीले भने ।

चक्कु लागेपछि घाइते भएका चोकबहादुरलाई उपचारका लागि गाउँलेले मणिपाल अस्पताल लगेका थिए । उनको बाटैमा मृत्यु भएको बताइएको छ ।