काठमाडौं । ललितपुरको कुपण्डोलमा रहेकाे खड्गी इन्स्टिच्यूट अफ इण्डोयुरोलोजीले विपन्न वर्गका लागि तीन दिने निःशुल्क मृगौला पत्थरीको शल्यक्रिया शिविर सम्पन्न गरेको छ ।

आरुस लाइफ स्टाइल, नेपाल र रेड क्रेस्सेन्ट अफ कुवेतसँगको सहकार्यमा खड्गी इन्स्टिच्यूट अफ इण्डोयुरोलोजीले फागुन १८ गतेदेखि २० गतेसम्म निःशुल्क मृगौलाकाे पत्थरीको शल्यक्रिया शिविर सञ्चालन गरेको थियो ।

उक्त शिविरमा २७ जना विपन्न विरामीले सेवा लिएका छन् । इन्स्टिच्यूटका प्रबन्ध निर्देशक एवं कन्सल्ट्यान्ट युरोलोजिष्ट डा. सञ्जय खड्गीले तीन दिन सञ्चालन भएको शिविरमा २७ जना मिर्गौला पत्थरीका बिरामीको मिनी पीसीएनएल प्रविधिबाट निःशुल्क शल्यक्रिया गरिएको जानकारी दिए ।

‘हामीले यो शिविरमा ४० जनालाई सेवा दिने योजना थियो । तर २७ जना मात्र विपन्न विरामी आएका आउँनुभयो,’ उनलेभने,‘२२ जना पुरुष र ५ जना महिलाले सेवा लिनुभएको छ।’

डा. खड्गीले मिनी पीसीएनएल ठुलो चिरफारबिना नै शल्यक्रिया हुने यो सेवा दुखाइरहित हुनुका साथै यसमा बिरामीको अस्पतालको बसाइ पनि अत्यन्त न्युन हुने समेत जानकारी दिए ।

उक्त शिविरमा ६५ वर्ष उमेरसम्मका मृगौलाका पथरीका बिरामीले सेवा लिएका थिए भने ४० एमएमसम्मको पथरीको मिनी पीसीएनएल प्रविधिबाट निःशुल्क शल्यक्रिया गरिएको थियो ।
गत वर्ष धनगढीमा सञ्चालन गरेको निशुल्क निशुल्क मृगौलाको पथरी शल्यक्रिया शिविरमा ३३ जनाले उपचार सेवा लिएको खड्गी इन्स्टिट्युट अफ इण्डोयुरोलोजीले जानकारी दिएको छ ।

शिविरबाहेक इन्स्टिच्यूटले अन्य समयमा पनि सरकारी दरमै हरेक दिन चार जना विपन्न बिरामीलाई मिर्गौला पत्थरीको शल्यक्रिया गर्ने कार्यक्रम सञ्चालन गर्दै आएको समेत खड्गी इन्स्टिच्यूटअफ इण्डोयुरोलोजीले जनाएको छ ।