काठमाडौँ । जारी युद्धका बीच रुस र युक्रेन तेस्रोपटक वार्ता गर्ने भएको छ । युद्ध चर्किँदै जाँदा दुई देशबीच शान्ति वार्ता हुन लागेको हो ।

दुई देशबीच भोलि सोमबार वार्ता हुने भएको हो । यसअघि दुई देशबीच भएको दुई वार्ता असफल भएको थियो । सो वार्ता युक्रेन र बेलारुसबीचको सीमामा भएको थियो ।

यसपटकको वार्ता कहाँ हुने भन्नेबारे केही खुलाइएको छैन । रुसी र युक्रेनी अधिकारीबीच भएको पहिलो र दोस्रो चरणको वार्तामा कुनै निष्कर्ष ननिस्किएपछि तेस्रोपटक वार्ता हुने निश्चित भएको हो ।

सोमबार वार्ता हुने युक्रेनका तर्फबाट वार्ता टोलीका सदस्य डेभिड आरकसानले जानकारी दिए । उनले आफ्नो सामाजिक सञ्जाल फेसबुकमार्फत तेस्रो चरणको वार्ता हुने बताएका हुन् ।

दोस्रो चरणको वार्ता सकिएपछि वार्तामा सहभागी अधिकारी आआफ्नो देशको राजधानी फर्किएर आवश्यक परामर्श गरी तेस्रो चरणको वार्ता गर्न तयारी गरेका थिए ।
रुस पछिल्लो चरणमा वार्ता जारी राख्न सहमत भएको थियो । सोहीबमोजिम दुवै पक्ष वार्तामा बसेका थिए ।

रुस र युक्रेनले आगामी केही दिनभित्र अर्को उच्च स्तरीय वार्तामा बस्ने भएका शुक्रबार बताइएको थियो । उता रुसले भने पछिल्ला दिनमा युक्रेनको राजधानी किभका आवासीय क्षेत्रमा हवाई आक्रमण गरेको छ । रुसले यहाँका आवासीय क्षेत्रमा गोलाबारी गरिरहेको आरोप लगाइएको छ ।

युक्रेनी राजधानी किभमा खतराको जनाउ दिने साइरन बजेका बताइएको छ । त्यस्तै, युक्रेनको उत्तरी शहर चर्निभमा पनि गोलाबारी भइरहेको छ ।