काठमाडौं । नेपालमा कुल जनसंख्याको १८.८ प्रतिशतमा कानको समस्या रहेको पाइएको छ ।

स्वास्थ्य सेवा विभागअन्तर्गत आँखा, नाक, कान घाँटी तथा मुख स्वास्थ्य शाखाको एक सर्भेले १८.८ प्रतिशतमा कानको समस्या रहेको देखाएको हो । उक्त सर्भे गत बैशाखदेखि साउनसम्ममा सात वटै प्रदेशका २८ जिल्लाका समुदाय र विद्यालयका १७ हजार ५९ जनामा गरिएको थियो । जसमा सबैभन्दा बढी कानको समस्या लुम्बिनी प्रदेशमा रहेको देखाएको छ । कुल सहभागीहरुमध्ये कान सम्वन्धी २४.८ प्रतिशत रहेका थिए ।

शाखाका प्रमुख डा प्रकाश बुढाथोकीका अनुसार सर्भेबाट कानसम्वन्धी समस्या मुस्लिम धर्मावलम्बीमा बढी भएको पाइएको छ । कान रोग १८ बर्षमुनिका अर्थात विद्यालय उमेरका बालबालिकामा १.२२ गुणा जोखिम बढी देखिएको छ । पुरुषभन्दा महिलामा जोखिम ०.९४ गुणा बढी छ ।

कान सम्वन्धी जोखिममा रहनेहरुमा एलर्जी राईनाईटिस, दम, धुम्रपान तथा मदिरा प्रयोगकर्ता,लामोसमय अस्पताल भर्ना तथा लामोसमय चर्को ध्वनीमा रहेकाको रहेको बताईएको छ ।
कानेगुजी भई समस्या भएका ४८ प्रतिशत, अट्राईटिस मेडिया भएकामा १२।८ प्रतिशत समस्या देखिएको छ । उनले सर्भेको बिस्तृत बिश्लेषण आगामी दुई महिना भित्र आईसक्ने डा. बुढाथोकीले जानकारी दिए ।

डा बुढाथोकीले कानको सक्रमणको समयमै उपचारको पहुच नहुनु,प्राथमिक उपचार तथा जनचेतनामा कमी र बढ्दो चर्को ध्वनीमा लगातार लामो समयसम्म काम गर्ने लगायतका कारण रहेको बताउँछन् ।