काठमाडौँ । अमेरिकाबाट नेपाल आएका भुटानी शरणार्थी सुनसहित पक्राउ परेका छन्। ड्रोनभित्र सुन लुकाएर ल्याएको आरोपमा अनिषहाङ बहिङ राईलाई त्रिभुवन अन्तर्राष्ट्रिय विमान स्थलबाट बिहीबार पक्राउ गरेको हो।

पक्राउ परेका राईले उनले ड्रोन ह्यान्डब्यागमा बोकेर ल्याएका थिए। तर, त्यसलाई उनले एक्सरे मेसिनमा हाल्न मानिरहेका थिएनन्। कर्मचारीले शंका लागेर मेसिनमा हाल्दा शंकास्पद वस्तु देखिएको थियो। ड्रोनको लेन्सनिर सुनको बिस्कुट भेटिएपछि उनलाई पक्राउ गरेको हो।

सुरूमा उनीबाट सय ग्राम सुन बरामद भएको थियो। त्यसरी सुन भेटिएपछि प्रहरी तथा कर्मचारीले उनको अर्को लगेज पनि चेक गरेको थियो। त्यसभित्र रहेको जुत्ताभित्रको भागबाट पनि चाँदीको जलप लगाइएको धातु बरामद भएको प्रहरीले जनाएको छ।

उनीबाट पाँच वटा फोन पनि बरामद भएको छ। पक्राउ परेका राईलाई महानगरीय प्रहरी वृत्त गौशालाको हिरासतमा राखिएको छ। उनीमाथि अनुसन्धान अघि बढेको भन्सार कार्यालयले जनाएको छ।