काठमाडौं । वैशाख ३० को स्थानीय निर्वाचनको लागि प्रहरी प्रधान कार्यालयले एक लाखको संख्यामा म्यादी प्रहरी भर्नाका लागि आजदेखि आवेदन लिन थालेको छ ।

४० दिनका लागि म्यादी प्रहरी भर्ना गर्न लागिएको हो । म्यादी प्रहरीका लागि आजदेखि ११ चैतसम्म आवेदन दिन सकिने प्रहरी प्रधान कार्यालयका प्रवक्ता प्रहरी वरिष्ठ उपरिक्षक (एसएसपी) विष्णु कुमार केसीले जानकरी दिए ।

प्रहरी प्रधान कार्यालयले निकालेको सूचना अनुसार कुनै पनि नैतिक पतन नदेखिएको र फौजदारी अभियोग नलागेको हुनुपर्ने छ । १८ वर्ष पूरा भएका र ५४ वर्ष ननाघेका नेपाली नागरिकले म्यादी प्रहरीमा भर्नाका लागि आवेदन दिन सक्ने छन् ।

प्रहरी जवान सरह स्वास्थ्य मापदण्ड भएकाहरुलाई भर्ना हुनका लागि योग्य मानिनेछ । म्यादी प्रहरीले दिनको ७५६ रुपैयाँका दरले तलब पाउँनेछन्।

कुन प्रदेशमा कति म्यादी प्रहरी ?
प्रहरी प्रधान कार्यालयका अनुसार सातै प्रदेश र उपत्यकामा गरी १ लाखको संख्यामा म्यादी प्रहरी खटाइनेछ । सबैभन्दा बढी मधेस प्रदेशमा २१ हजार ६ सय ९८ जना भर्ना गर्न लागिएको छ । सबैभन्दा कम कर्णाली प्रदेशमा ७ हजार ७ सय १३ जनाको दरबन्दी छ ।

प्रदेश १ मा १७ हजार ८ सय ३१, (उपत्यकाबाहेक) वाग्मती प्रदेशमा ११ हजार ३ सय ६३ जना, गण्डकीमा १० हजार ६ सय २५, लुम्बिनी प्रदेशमा १६ हजार ९८ र सुदूरपश्चिममा ९ हजार ९ सय ३७ जनाको दरबन्दी रहेको प्रहरी प्रधान कार्यालयले जनाएको छ । उपत्यकामा ४ हजार ७ सय ३५ जनाको दरबन्दी छ ।

मतदान स्थल र मतदान केन्द्रको अन्तिम विवरणपछि भने यो संख्यामा केही घटबढ हुन सक्ने निर्वाचन आयोगको भनाइ छ ।
देशभर रहेका ७७ वटै जिल्ला प्रहरी कार्यालय तथा प्रहरी म्यादी प्रहरीमा भर्ना हुनका लागि सबै जिल्ला प्रहरी कार्यालयमा आवेदन दिन सकिने छ ।

म्यादी प्रहरीले प्रहरी जवान सरह सुविधा पाउने छन् । छनौट भएका म्यादी प्रहरीलाई ७ दिन तालिम दिएर खटाउने सरकारको तयारी छ ।