काठमाडौँ । जिल्ला अदालत काठमाडौँले सवारी ज्यानसम्बन्धी मुद्दामा १० वर्षको कैद साजयको माग दाबीलाई घटाएर ६ महिनामा झारेपछि फैसला विवादमा परेको छ ।

बुढानीलकण्ठको ‘हिट एण्ड रन’ मुद्दामा पृथ्वी मल्ललाई मादक पदार्थ सेवन गरी सवारी चलाएर लापरवाहीपूर्ण रुपमा पैदल यात्रीलाई ठक्कर दिएर ज्यान लिएको अभियोगमा दोषी ठहर गरे पनि ६ महिनाको न्यूनतम जेल सजाय र १० हजार सजाय सुनाएपछि विवादमा परेको हो ।

अदालतले माग दाबीको भन्दा फरक दफा लगाएर १० वर्षको माग दाबीलाई ६ महिनामा झारेको र १० हजार जरिवना तोकेपछि सरकारी वकिल कार्यालय र बाहिर पनि असन्तुष्टिका स्वर मुखर भएका छन् ।

‘यो निकै न्यूनतम सजाय हो, यसले न्याय प्रणालीलाई विश्वास योग्य बनाउँदैन,’ जिल्ला सरकारी वकिल कार्यालय काठमाडौँका एक अधिकृतले भने । प्रहरीले सरकारी वकिलको कार्यालयमा बुझाएको माग दाबीलाई सदर गर्दै मुद्दा दायर गर्दा मल्लाई १० वर्ष कैद र सोही अनुसार जरिवाना हुनु पर्ने माग गरिएको थियो ।

तर, जिल्ला न्यायाधीश सूर्यप्रसाद अधिकारीको एकल इजलासले आशिंक दाबी पुग्ने फैसला सुनाएको थियो । काठमाडौँको बुढानीलकण्ठमा मल्लले अत्यधिक मदिरा सेवन गरी चलाएको कारको ठक्करबाट २०७६ मंसिरमा लिला देवकोटाको ज्यान गएको थियो । सो फैसलामा सर्वोच्च अदालतले नै कोरोना भाइरस (कोभिड–१९)को समयमा मल्ललाई थुनामुक्त गराएको थियो । उनले सात महिना जेल जीवन बिताएकाले सोमबार भएको फैसलाअनुसार अब जेल सजाय भोग्नु पर्ने छैन ।

‘जिल्ला न्यायाधीवक्ताको कार्यालय काठमाडौँले माग दाबी लिँदा सवारी तथा यातायात व्यवस्था ऐन–२०४९ को दफा १६१ को उपदफा २ अनुसार सजायको माग गरेको थियो, तर जिल्ला अदालतबाट सोमबार फैसला आउँदा ऐन २०४९ दफा १६१ को उपदफा ३ बमोजिम कसुरमा सोहीअनुसार कारबाही गर्नु भन्ने फैसला भयो’, स्रोतले भन्यो ।

फैसलामा चालकले लापरबाहीपूर्वक सवारी साधन चलाएको कुरा आंशिक मात्र पुष्टि भएको उल्लेख छ । यो मुद्दामा सरकारी पक्षले भवितव्य नभई जानाजान ज्यान मार्ने कार्य भएको दाबी गरेको थियो ।

काठमाडौँ जिल्ला अदालतले २ वर्षअगाडिको सो घटनाबारे फैसला सुनाउँदै चालकलाई जम्मा ६ महिना कैद र १० हजार जरिवाना गर्ने फैसला सुनाएको छ । यो कैद सजाय सवारी तथा यातायात व्यवस्था ऐनको दफा १६१ को उपदफा ३ अनुसारको हो ।

सरकारी पक्षले मल्लले लापरबाहीपूर्ण रुपमा सवारी चलाएको मदिरा सेवन गरेको र नेपालको सवारी चालक अनुमति पत्रसमेत नभएको भन्दै सवारी तथा यातायात व्यवस्था ऐनको दफा १६१ को उपदफा २ अनुसार सजाय हुनु पर्ने माग दाबी गरेको थियो ।

जिल्ला अदालतको सोमबारको फैसलापछि कारागारको रेकर्डमा मल्ल सात महिना कारागार बसिसकेकाले उनी पुनः कारागार बस्नु नपर्ने भएको छ । उनले अब तोकिएको १० हजार जरिवाना तिरेर उन्मुक्ति पाउने छन् ।

कारागारको रेकर्डमा सात महिना कारागार बसेको भनिए पनि उनी लामो समय अस्पताल बसेका थिए । अस्पतालबाट उनले सर्वोच्चमा पुनरावेदन गरेका थिए । न्यायाधीश सपना प्रधान मल्लसहितको इजलासले धरौटीमा रिहा गर्न आदेश गरेपछि उनी रिहा भएका थिए ।

विं.सं. २०७७ असार ३१ गते सर्वोच्चका न्यायाधीशद्वय मल्ल र मनोज कुमार शर्माको इजलासले सो घटनाका अभियुक्त पृथ्वी मल्ललाई पाँच लाख धरौटीमा थुना मुक्त गर्न आदेश दिएको थियो । अमेरिकामा बस्दै आएका काठमाडौँका २१ वर्षीय पृथ्वी मल्ल २३ मंसिर २०७६ मा नेपाल आएका थिए ।

त्यसको तीन दिनपछि २७ मंसिरमा उनी आफैँले बा १४ च ६१२३ नम्बरको कार चलाई साथी करिश मास्केलाई लिएर नक्साल नारायण चौरमा जिम गर्न पुगेका थिए । त्यहाँबाट साँझ साढे ७ बजेतिर बालुवाटारस्थित पलेञ्ज गार्डेन रेष्टुराँमा पुगेर खाना खाएपछि उनीहरू रातभर ठमेलमा बसेका थिए ।

त्यहाँबाट रातको साढे १ बजे एलओडी क्लबमा पुगे । त्यसपछि बिहान साढे ४ बजे ठमेलस्थित सेनेठ क्लबमा मास्केका दुई जना केटी साथीहरू परमिता राणा र मनिषालाई भेटेर उनीहरू निस्केका थिए । प्रहरीमा दिएको बयानअनुसार त्यसपछि उनीहरू बिहानको ५ बजे बुढानीलकण्ठ हुँदै ग्रिनभ्याली रिसोर्ट पुगेका थिए ।

त्यहाँ गएर पनि निरन्तर मदिरा सेवन गरेका उनीहरू चढेको कारले त्यहाँबाट पुनः घरतर्फ फर्कंदा सडकको विपरीत दिशामा फुटपाथमा हिँड्दै गरेकी लिला देवकोटालाई ठक्कर दिँदा ज्यान गएको थियो । सडक दुर्घटना गराएर फरार भएका उनी परमिता राणाको फेसबुक स्टाटसका कारण उनलाई प्रहरी अनुसन्धानमा पुर्याएको थियो ।

सवारी ऐनमा लापरबाहीपूर्ण रुपमा सवारी चलाएर ज्यान गएको हकमा १० वर्षसम्म कैद र ३० हजारसम्म जरिवानाको प्रावधान छ । कसैको ज्यान मर्न सक्छ भन्ने जस्तो नदेखिएको अवस्थामा दुर्घटना भएर कसैको ज्यान गएको अवस्थामा एक वर्ष कैद र दुई हजार जरिवानाको प्रावधान छ ।

न्यायाधीश सूर्यप्रसाद अधिकारीको एकल इजलासले आंशिक मात्रै माग दाबी पुग्ने फैसला गरेकाले पनि सो फैसालको विवादित बनेको एक सरकारी वकिलको दाबी छ । काठमाडौँ जिल्ला सरकारी वकिल कार्यालयका प्रमुख गंगाप्रसाद पौडेल फैसला त्रुटिपूर्ण भएमा फैसलाको पूर्णपाठ आएपछि मुद्दा पुनरावेदनमा जान सकिने बताएका छन् ।

मल्लले प्रहरी अनुसन्धानको क्रममा नेपाली सवारी चालक अनुमतिपत्र पेस गर्न सकेका थिएनन् । तर, पछि उनले चार पाङग्रे र दुई पाङग्रे सवारी चलाउने अनुमतिपत्र पाएको तर, रक्सी खाएर गाडी चलाउँदा ट्राफिकले भेटेर चिट काटेर लाइसेन्स लिएकाले अहिले आफूसँग लाइसेन्स नभएको बयान दिएका थिए ।

उनले अदालतमा रक्सी नखाएको दाबी गरेका थिए । विं.सं. २०७६ मंसिर २८ मा प्रहरीले पक्राउ गरेपछि मेन्टल्ली ह्यारेसमेन्ट गरेरकाले प्रहरी समक्ष दिएको बयान आफ्नो नभएको समेत भन्न भ्याएका थिए ।