काठमाडौँ । भारतको आसाम राज्यमा चट्याङ लागेर कम्तीमा १४ जनाको मृत्यु भएको छ । आइतबार आएको भिषण वर्षा र चट्याङमा परेर उनीहरूको मृत्यु भएको समाचारमा जनाइएको छ ।

आसाममा शुक्रबारदेखि व्यापक वर्षा भएको छ । वर्षासँगै हावाहुरी पनि आएको र यहाँका कतिपय भौतिक संरचनामा पनि क्षति पुर्‍याएको थियो ।

आसामको प्राकृतिक प्रकोप व्यवस्थापन विभागले दिएको जानकारीअनुसार शुक्रबार आठ जनाको ज्यान गएको थियो । यस्तै, आइतबार थप छ जनाको ज्यान गएको थियो । यहाँ चट्याङबाट मात्र अरु दर्जनौँ व्यक्ति घाइते भएका अधिकारीले जनाएका छन् ।

यस क्षेत्रमा वर्षासँगै पर्ने चट्याङले नागरिकको ज्यान जाने गरेको छ । शुक्रबारदेखि आइतबारसम्म जारी वर्षा, हावाहुरीले दशौँ हजार नागरिकका घर भत्काएको तथा अन्य भौतिक संरचनामा क्षति पुगेर प्रभावित भएका बताइएको छ ।