हेटौँडा । स्थानीय तहको निर्वाचन नजिकिएसँगै मकवानपुरमा चुनावी माहोल तातेको छ । तर, पाँच दलीय सत्ता गठबन्धनको उम्मेदवारको अझै टुंगो लाग्न सकेको छैन ।

गठबन्धन दलहरूले हेटौँडा उपमहानगरको प्रमुखका लागि आआफ्नो दाबीसहित उम्मेदवारको नाम सिफारिस गर्न थालेका छन् । गठबन्धनका दलहरूले मेयर पदका लागि अडान नछाडेपछि अझै उम्मेदवार टुंगो लाग्न नसकेको हो ।

नेकपा एकीकृत समाजवादीले आइतबार मेयर पदका लागि दुई जनाको नाम सिफारिस गरेको छ । नेपाली कांग्रेसले पनि सोमबार मेयर र उपमेयर पदका लागि तीन–तीन जनाको नाम सिफारिस गरेको छ ।

नेकपा एसले हालकी उपमेयर मीना कुमारी लामा र एकीकृत समाजवादी मकवानपुरका अध्यक्ष श्रीधर पोखरेललाई मेयरमा उम्मेदवार बनाउन सिफारिस गरेको हो । अघिल्लोपटक एमालले जितेको स्थानमा समाजवादीले दाबी गरिरहेको छ । समाजवादीले हेटौँडाका १९ वटै वडाध्यक्षहरूमा पनि नाम सिफारिस गरेको छ ।

कांग्रेस हेटौँडा उपमहानगर समितिले हेटौँडाको मेयरमा आनन्दराम पराजुली, उत्सव इटेनी र लक्ष्मी श्रेष्ठको नाम सिफारिस गरेको छ । उपमेयरमा अमृता थापा, इन्दिरा न्यौपाने र तारा राई कार्कीको नाम सिफारिस गरेको छ ।

गठबन्धनको टुंगो लागिसकेपछि कांग्रेस जिल्ला कार्य समितिले केन्द्रमा सिफारिस गर्ने नेपाली कांग्रेस मकवानपुरका सभापति बुद्ध लामाले बताए । केही दिनमा नै उम्मेदवारको टुंगो लगाउने उनको भनाइ छ । नेकपा माओवादीले भने आफ्नो तर्फबाट मेयर तथा उपमेयरको नाम सिफारिस गरेको छैन ।