काठमाडौं । नेत्रविक्रम चन्द (विप्लव) नेतृत्वको नेपाल कम्युनिष्ट पार्टीका विद्रोही नेताहरूको भेलाले विप्लवलाई महासचिव पदबाट हटाएको छ । चुनाव उपयोगको नीति लिँदै विप्लव संसदबाटतिर भासिएको भन्दै विप्लवलाई महासचिव बाट हटाउने निर्णय उक्त पार्टीका विद्रोही समुहको आज देखि चितवनको पर्सामा शुरु भएको राष्ट्रिय भेलाले गरेको छ ।

विप्लवलाई महासचिवबाट हटाइएपछि पार्टीमा तत्काल संयोजक बनाउने निर्णय भेलाले लिएको छ । भेलाले सचिवालय सदस्य धर्मेन्द्र बास्तोला (कञ्चन)लाई पार्टीको संयोजक चयन गरेको छ ।

पार्टीका प्रवक्ता रहेका खडकबहादुर विश्वकर्मालाई पनि विद्रोही नेताहरुको भेलाले प्रवक्ताको जिम्मेवारीबाट हटाएको छ । ६४ सदस्यीय केन्द्रीय समिति र ४ सदस्य रहेको सल्लाहकार गरी ६८ सदस्यीय केन्द्रीय नेतृत्वमध्ये ३८ जना भेलामा उपस्थित राष्ट्रिय भेलामा रहेको केन्द्रीय सदस्य गुणराज लोहनीले जानकारी दिए ।

भेला अहिले पनि जारी छ । भेलामा बास्तोला र हेमन्तप्रकाश वलीले पेश गरेको दस्ताबेजमाथी छलफल शुरु भएको छ ।

चुनाव उपयोग गर्ने विप्लव र खडकवहादुर विश्वकर्माको लाइन सँग धर्मेन्द्र बास्तोला, हेमन्तप्रकाश वली लगायत नेताहरुले असहमति जनाएका थिए ।

यही विवादका वीच विप्लवले सचिवालय सदस्यहरु धर्मेन्द्र बास्तोला र हेमन्तप्रकाश वलीलाई पार्टीको कुनै पनि जिम्मेवारीमा नरहने गरी पदमुक्त गरेका थिए ।
त्यसपछि विद्रोहीहरुको भेलाले पनि विप्लवलाई पार्टी महासचिव र पार्टीबाटै हटाउने निर्णय गरेको हो । प्रकाण्डलाई पनि जिम्मेवारीबाट हटाउने निर्णय विद्रोही पक्षको भेलाले गरेको हो ।

भेला अझै एक दुई दिन चल्ने बताईएको छ ।