काठमाडौँ । विश्वका प्रमुख सात देशका नेताले युक्रेनका राष्ट्रपति भोलोदिमिर जेलेन्स्कीसँग छलफल गर्ने भएका छन् । अर्थतन्त्रमा मजबुत मानिएका ती देशका नेताले युक्रेनलाई गर्न सकिने सहयोगका बारेमा छलफल गर्ने अधिकारीले जनाएका छन् ।

जर्मन सरकारका एक जना प्रवक्ताले आगामी आइतबार उनीहरूका बीचमा छलफल हुने शुक्रबार जानकारी दिएका छन् । अहिले जी ७ को अध्यक्षसमेत रहेको जर्मनीले बैठकको संयोजन गरेको समाचारमा जनाइएको छ ।

जर्मन प्रवक्ता क्रिश्चियन होफमानले पत्रकारसँग भने, ‘जर्मनीका चान्सलर अलाफ सोल्जले नै बैठकको संयोजन गर्नुहु ने भएको छ ।’ उनका अनुसार भिडियोमार्फत हुने यस्तो बैठक यस वर्षमात्रै अहिले तेस्रोपटक हुन लागेको हो ।

दोस्रो विश्व युद्ध अन्त्य भएको ऐतिहासिक दिनको रुपमा लिइने मे ८ कै दिन यसपटकको बैठक हुन लागेको जनाइएको छ । बैठकमा विश्वव्यापी समसामयिक विविध विषयमा सामान्य छलफल गरी मुख्य छलफल युक्रेन संकटमा केन्द्रित हुने अधिकारीले जनाएका छन् ।

बैठकमा युक्रेनका राष्ट्रपति जेलेन्स्कीले देशको अहिलेको अवस्था र आवश्यकताका बारेमा विश्वका प्रभावशाली ती नेतालाई जानकारी दिने छन् । जी ७ का नेता युक्रेनलाई सहयोग गर्ने र रुसलाई आक्रमण अन्त्यका लागि दबाब दिने पक्षमा रहँदै आएका छन् ।

जी ७ अन्तर्गत क्यानडा, फ्रान्स, जर्मनी, इटाली, जापान, बेलायत र अमेरिका पर्दछन् । ती सबै देशले पहिलेदेखि नै युक्रेनको पक्षमा आफ्नो मत जाहेर गरिरहेका थिए । आआफ्नो तर्फबाट युक्रेनलाई यसअघि सहयोग गर्दै आएका थिए ।

गत फेब्रुअरीको अन्त्यतिर रुसले युक्रेनमाथि आक्रमण शुरु गरेकोमा अहिलेसम्म सयौँको मृत्यु भएको छ भने लाखौँ विस्थापित भएका छन् । ठूलो भौतिक क्षति पनि भएको छ ।