काठमाडौँ । श्रीलंकाका प्रधानमन्त्री महिन्दा राजपक्षले पदबाट राजीनामा दिएका छन् । सरकारविरुद्ध प्रदर्शन जारी रहँदा उनले पदबाट राजीनामा दिएका हुन् । उनले राष्ट्रपति गोटाबाया राजपक्षलाई राजीनामा पठाएका हुन् ।

देशमा अभूतपूर्व आर्थिक संकटविरुद्ध प्रदर्शन गरिरहेका मानिसले राष्ट्रपति गोटाबाया राजपक्ष र उनको मन्त्रिमण्डलमाथि राजीनामा दिन दबाब दिइरहेका छन् ।

श्रीलंका सरकारले हाल देशमा संकटकाल लागू गरेको छ। स्थानीय मिडिया रिपोर्टका अनुसार राष्ट्रपति भवनमा गोटाबायाको नेतृत्वमा भएको बैठकमा सहभागी महिन्दा राजपक्षसँग राजीनामा दिन अनुरोध गरिएको थियो। जसलाई उनले स्वीकार गरेको बीबीसीले जनाएको छ ।

श्रीलंकामा क्याविनेटले प्रधानमन्त्री राजपक्षले देशको खराब आर्थिक अवस्थालाई सम्हाल्न असफल भएका कारण राजीनामा दिएको जनाएको छ। उनको राजीनामासँगै मन्त्रिमण्डल भंग भएको छ ।

श्रीलंकामा खाद्यान्न, पेट्रोल र औषधिको ठूलो मात्रामा कमी रहेको छ । स्वतन्त्रतापछि श्रीलंका सबैभन्दा ठूलो आर्थिक संकटमा फसेको छ । आर्थिक संकट चुलिएसँगै श्रीलंकाको जनजीवन नराम्रोसँग प्रभावित भएको छ ।