काठमाडौँ । फिलिपिन्समा पूर्व राष्ट्रपति फर्डिनान्ड मार्कोसका छोरा फर्डिनान्ड मार्कोस जुनियर राष्ट्रपतिमा निर्वाचित भएका छन् । त्यसैगरी उपराष्ट्रपतिमा वर्तमान् राष्ट्रपति रोड्रिगो डुटेर्टेकी छोरी सारा निर्वाचित भएकी छन् ।

पूर्व राष्ट्रपति मार्कोस र वर्तमान राष्ट्रपति डुटेर्टेले तालमेल गरेर निर्वाचनमा उम्मेदवार उठाएका थिए । दुई प्रभावशाली राजनीतिक नेताहरूको तालमेलका कारण उनहरूका दुवै उम्मेदवार अत्यधिक मतान्तरका साथ मंगलबार विजयी भएका छन् ।

राष्ट्रपतिका उम्मेदवार मार्कोस जुनियरले कूल मतको ५६ प्रतिशत मत पाएको र त्यो संख्या मार्कोसको प्रमुख प्रतिस्पर्धीभन्दा दोब्बर भएको निर्वाचन आयोगले जनाएको छ ।

उनका निकटतम प्रतिस्पर्धीको रूपमा उदारवादी एवं वर्तमान उपराष्ट्रपति लेनी रोब्रेडो चुनावी मैदानमा रहेका थिए । नवनिर्वाचित राष्ट्रपति मार्कोस जुनियरले एक करोड ६० लाखभन्दा बढी मत प्राप्त भएको निर्वाचन आयोगले जनाएको छ ।

राष्ट्रपतिसहित देशभरबाट झण्डै १८ हजार प्रतिनिधि चयनका लागि सोमबार देशभरी मतदान भएको थियो । त्यसअन्तर्गत राष्ट्रपति, उपराष्ट्रपति र एक हजार दुई सिनेटरसहित तीनभन्दा बढी संसदका प्रतिनिधि साथै एक हजार सातभन्दा बढी अन्य स्थानीय प्रतिनिधि रहेका छन् ।

मतदानका लागि देशभरि ३७ हजार २११ मतदान केन्द्रहरु तय गरिएको निर्वाचन आयोगले जनाएको छ ।