काठमाडौं । गत वैशाख ७ गते दिउँसो राजधानीको कालिकास्थानस्थित अध्यागमन कार्यालयमा एका एक हल्ला मच्चियो । एउटा पुरुष र दुई महिलाबीच एउटी बालिका खोसाखोस हुँदा हल्ला मच्चिएको थियो ।

हो-हल्ला र असहज स्थिति बन्न पुगेपछि अध्यागमन विभागले हस्तक्षेप समेत गरेको थियो । अमेरिकी नागरिक करन गोएल र भारतीय नागरिक कनिका लुथ्राबीच एउटी बालिका खोसाखोसको अवस्था सिर्जना भएको थियो । ति बालिका करन र कनिकाकी छोरी हुन् ।

खोसा-खोसकैबीच स्थिति जटिल बन्दै गएपछि अध्यागनम विभागले दुबै जनालाई एउटा कोठामा राखेर विवाद मिलाउने जमर्को गरेको थियो । उक्त छलफलमा नेपालस्थित अमेरिकी र भारतीय दूतावासका अधिकारीहरू समेत सहभागी थिए ।

करन आफ्नो छोरीका लागि भिसा लिन अध्यागमन विभाग पुगेका थिए तर दुवैपक्षबीच विवाद भएपछि उनी भिसाको केही कामै नभई फर्किएका थिए ।

कनिकाले आफ्नी ८ वर्षीया छोरी मेहरलाई करनले चोरेर ल्याएको र नेपालबाट अमेरिका लैजान लागेको बताएकी थिइन् । भारतीय सर्वोच्च अदालतको आदेशपछि मेहर सन् २०१७ देखि कनिकासँगै रहँदै आएकी थिइन् ।

गत अप्रिल १३ देखि ५ दिनका लागि भारतीय उच्च अदालतले राहदानी जमानतमा राखेर करनलाई छोरी मेहरलाई उनीसँगै राख्ने अनुमति दिएको थियो । तर, छोरी फिर्ता नगरि स्थल मार्ग हुँदै करन काठमाडौं आइपुगेको र अमेरिका जान लागेको कनिकाले जनाएकी थिइन् ।

ओरिजिनल पासपोर्ट भारतको अदालतमा राखेपनि करनले अर्कै पासपोर्ट प्रयोग गरेर अमेरिका जान लागेको कनिकाको दाबी छ । कनिका करनको पुर्व श्रिमती हुन् ।

अमेरिका र भारतको कुटनितिक द्वन्द्व चुलियो
अहिले यो विषय करन र कनिकाको मात्रै नभई भारत र अमेरिकाको कुटनीतिक विषय समेत बन्न पुगेको छ । स्रोतका अनुसार अमेरीकाले करनको पक्षमा सहयोग गर्न आग्रह गरेको छ भने भारतले समेत आफ्नो पक्षमा सहयोग गर्न आह्वान गरेको पाईएको छ ।

गत जेठ ६ गते (शुक्रबार) नेपाल भ्रमणमा आएकी अमेरिकी विदेश संयोजक उज्रा जियाले बालिका र परिवारको विषयमा चासो व्यक्त गरेकी उच्च स्रोत बताउँछ ।

अमेरिकी विदेश संयोजक जियाले प्रधानमन्त्री शेर बहादुर देउवा, गृहमन्त्री बालकृष्ण खाण, परराष्ट्रमन्त्री नारायण खड्कासँगको भेटमा सो बालिकाको विषयमा कुरा गरेकी थिईन् । ति बालिकालाई अमेरिका लैजाने प्रवन्ध मिलाउन समेत प्रधानमन्त्री, गृहमन्त्री र परराष्ट्रमन्त्रीलाई अमेरिकी विदेश संयोजक जियाले आग्रह गरेको स्रोतको दाबी छ ।

जवाफमा नेपाली पक्षले अदालतमा विचारधीन विषयमा केही गर्न नसकिने बताएका छन् । अमेरिकी विदेश संयोजक जियाले यो विषयमा चासो देखाएसँगै भारत र अमेरिकाबीच कुटनितिक चासेको विषय बनेको स्पष्ट भएको छ ।