काठमाडौँ । सामाजिक सञ्जालको दुरुपयोग गरी अनलाइनमार्फत ठगी गरेको आरोपमा प्रहरीले राजधानीबाट एक जनालाई पक्राउ गरेको छ ।

पक्राउ पर्नेमा काठमाडौं महानगर १७ सोह्रखुट्टे बस्ने दोलखा शैलुङ गाउँपालिका ८ शैलुङगेश्वरीका ३५ वर्षीय उत्सव श्रेष्ठ रहेका छन् । उनलाई सोमबार काठमाडौं उपत्यका अपराध अनुसन्धान कार्यालय मिनभवनबाट पक्राउ गरेको हो ।

सामाजिक सञ्जाल वाट्सएप, इमो, बोटिम, भाइबरको दुरुपयोग गरी पीडितलाई आफू कम्बोडियास्थित क्यासिनोमा काम गर्ने व्यक्ति भन्दै उनले ठगी गरेको प्रहरीले जनाएको छ ।

उनले अमेरिकाबाट सञ्चालन भएको लटरीमार्फत ६ लाख २७ हजार ६११ युरो डलर परेको छ र उक्त रकम पाउनका लागि भन्दै विभिन्न भ्रमपूर्ण म्यासेज पठाई पीडितलाई विश्वासमा पारी ठग्ने गरेको प्रहरीको भनाइ छ ।

नेपालमा रहेका विभिन्न व्यक्तिको बैंक खातामा रकम जम्मा गर्न लगाई उनले २८ लाख ७९ हजार रूपैयाँ ठगी गरेको अनुसन्धानको क्रममा खुलेको प्रहरीले जनाएको छ । उनलाई ठगी सम्बन्धी कसुरमा आवश्यक कारकाहीका लागि जिल्ला प्रहरी परिसर काठमाडौं पठाइएको छ ।