काठमाडौं । अख्तियार दुरुपयोग अनुसन्धान आयोगले बुधबार पर्सा जिल्ला श्रीपुर मुर्ली स्थित नेपाल राष्ट्रिय विद्यापिठ उच्च माध्यामिक विद्यालयका प्रधानाध्यापक बलराम श्रेष्ठविरुद्ध विशेष अदालत, काठमाडौंमा आरोपपत्र दायर गरेको छ ।

प्रधानाध्यापक श्रेष्ठले विद्यालयमा विज्ञान प्रयोगशाला निर्माण, सामाग्री व्यवस्थापन, भवन निर्माण र महिला शौचालय निर्माण गर्ने भन्दै जिल्ला शिक्षा कार्यालयबाट २९ लाख ५० हजार रुपियाँ निकासा गरी विनियोजित रकम सम्बन्धित शीर्षकमा खर्च नगरी आफुखुशी खर्च गरेको अख्तियारले ठहर गरेको छ ।

अख्तियारका अनुसार प्रधानाध्यापक श्रेष्ठले २०६७/०६८ सालको साउन, भदौ र असोज तथा दशैं खर्च बापतको समेत ९२ हजार ३७८ रुपियाँ दोहोरो तलब लिएको उल्लेख गरेको छ ।

दायर आरोपपत्रमा प्रधानाध्यापक श्रेष्ठले विद्यालयका लेखा हेर्ने कर्मचारी राकेशमान श्रेष्ठको समेत मिलेमतोमा सार्वजनिक सम्पत्ति हानी नोक्सानी गरी भष्ट्राचार गरेको भन्दै प्रधानाध्यापक श्रेष्ठ र कर्मचारी राकेशमानलाई कानुन बमोजिम कैद र बिगो असुलउपर गरी पाउनसमेत मागदाबी गरिएको अख्तियारका प्रवक्ता श्याम प्रसाद भण्डारीद्वारा जारी विज्ञप्तीमा उल्लेख छ ।