काठमाडौं । सामाजिक सञ्जाल फेसबुकको मातृ कम्पनी मेटाकी प्रमुख कार्यसञ्चालन अधिकृत ९सिओओ० ले पदबाट राजीनामा दिएकी छिन् । फेसबुकका सिओओ शेरिल स्याण्डबर्गले १४ वर्ष यता सम्हाल्दै आएको उक्त पदबाट राजीनामा दिएकी छिन् ।

फेसबुक पोस्ट मार्फत नै उनले राजीनामाको पुष्टि गरेकी हुन् । उनले अब जीवनको नयाँ अध्यायको समय आएको बताएकी छिन् ।

शेरिल स्याण्डबर्ग फेसबुक स्थापना भएको ४ वर्षपछि सन् २००८ मा कम्पनीसँग जोडिएकी थिइन् । आफ्नो लामो कार्यकालमा उनले फेसबुकको डिजिटल विज्ञापन व्यवसायलाई निकै उत्कृष्ट ढंगले सम्हालिन् र कम्पनीलाई नयाँ उचाइँमा पुर्‍याइन् ।

फेसबुकलाई १०० अर्ब डलरको कम्पनीसम्म पूराउनका लागि उनको अहम भूमिका थियो। सोही कारण उनी फेसबुक सीईओ मार्क जुकरबर्गपछि कम्पनीमा दोश्रो वरिष्ठ अधिकारीको रुपमा कार्यरत थिइन् ।

मेटाको सिओओ पदबाट राजीनामा दिएपनि कम्पनीको बोर्ड अफ डाइरेक्टर्सको सदस्यको रुपमा भने काम गरिरहने ५२ वर्षकी स्याण्डबर्गले बताएकी छिन् ।

उनले फेसबुकमा लेखेकी छिन्, ‘भविष्यमा के हुन्छ भन्ने कुरा यकिनसाथ त म भन्न सकिदन तर मैले मेरो प्रतिष्ठान तथा परोपकारी कार्यमा ध्यान केन्द्रित गर्ने कार्य यसमा सामेल हुनेछ जुन मेरोलागि पहिलेदेखि नै निकै महत्वपूर्ण छ किनकी यस्तो कार्य महिलाका लागि निकै महत्वपूर्ण छ ।’

फेसबुक कम्पनीमा जोडिनु अगाडि स्याण्डबर्ग गुगलमा काम गर्दथिन् । फेसबुकमा आएसँगै युवा सीईओ मार्क जुकरबर्गसँग मिलेर फेसबुकलाई लाभहीन सोसल नेटवर्किङ साइटबाट माथि उठाएर नाफामूलक कम्पनीको रुपमा अगाडि बढाउनु उनको लक्ष्य थियो ।

उनले उक्त लक्ष्य पूरा गर्दै फेसबुकलाई विज्ञापन दिग्गज बनाउन सहयोग गरिन् र गुगल पछि विज्ञापनबाट धेरै कमाउने कम्पनीको दोश्रो स्थानमा फेसबुक आउन सफल भयो । प्रयोगकर्ताको संख्याको आधारमा पनि फेसबुकले चमत्कार गर्यो । फेसबुकका प्रयोगकर्ताको संख्या अहिले करीब ३ अर्ब छ ।

स्याण्डबर्गको राजीनामा पश्चात् अब जेभिएर ओलिभनले मेटा कम्पनीको नयाँ सिओओको रुपमा जिम्मेवारी सम्हाल्नेछन् ।