काठमाडौं । नेकपा माओवादी केन्द्रको विद्यार्थी संगठन अखिल (क्रान्तिकारी)भित्रको घर झगडाले चरम विवाद आएपछि माओवादीको केन्द्रीय कार्यालयको विस्तारित बैठकमा त्यसबारे नेताहरूले गम्भिर विर्मश गरेका छन् । गत असोज दोस्रो साता राष्ट्रिय सम्मेलन गरेर अध्यक्ष मात्र चयन गरेको क्रान्तिकारीले वैशाख ५ गते भर्चुअल बैठकबाट अन्य पदाधिकारी चयनको घोषणा गरिएको थियो ।

त्यस क्रममा १९ जना उपाध्यक्षसहित महासचिवमा दिपेश पुनलाई चयन भए । कूल ४१ जनाको पदाधिकारी क्रान्तिकारीको त्यो भर्चुअल बैठकबाट चयन गरिएको थियो । तर, महासचिवमै दाबी गरिरहेका पवन कार्कीलगायतले उक्त निर्णयमा सहमति जनाएनन् । कार्कीलाई उपाध्यक्ष चयन गरिएको छ । यद्यपि, उनले महासचिवमा दाबी गरिरहेका थिए ।

उनको दाबी मान्ने हो भने उक्त दिनको बैठक (वैशाख ५) मा भर्चुअलमा सबैलाई म्यूट गरेर पदाधिकारी घोषणा गरी बैठक समापन गरिएको थियो । जसका कारण उपाध्यक्षमा चयन भए पनि कार्की पक्षले आफ्नो असहमति जनाउन नपाएको जिकिर गरेको छ ।

यद्यपि, त्यसबाहेक अन्य पक्षको भने पदाधिकारी चयनमा विवाद देखिएको थिएन । त्यसपछि विवादले क्रान्तिकारीभित्र उग्र रुप लिन थालेको हो । कार्की पक्षले घोषित निर्णयलाई नमानेपछि समानान्तर गतिविधि गर्दै आएका थिए । उनलाई विद्यार्थी नेताहरूको भनाइमा माओवादी केन्द्रका वरिष्ठ नेता नारायणकाजी श्रेष्ठ समूहको साथ छ ।

यो विवाद बढ्दै जाँदा कार्की पक्षले आजका लागि काठमाडौँको थापाथलीस्थित थापाथली क्याम्पसमा समानान्तर गतिविधि गर्ने उद्देश्यले केही दिनअघि कार्यक्रम घोषणा गर्‍यो । पोष्टरमा प्रचण्डको फोटोसमेत राखेर यो पक्षले थापाथलीमा उपत्यका स्तरीय भेला तथा प्रशिक्षण कार्यक्रम राखेपछि दुवै पक्षबीचमा आरोप प्रत्यारोप थप चुलियो ।

समानान्तर भेला हुने भएपछि क्रान्तिकारीकी अध्यक्षले लगत्तै केन्द्रीय कार्यालयको बैठक बोलाइन् । समानान्तर गतिविधि गरेको र संगठनको अनुशासन उल्लंघन गरेको आरोपमा कार्कीलाई २४ घण्टे स्पष्टिकरण कार्यालयको बैठकबोट सोध्ने निर्णय लिइन् ।

त्यसपछि कार्कीलाइ स्पष्टिकरण क्रान्तिकारीकी अध्यक्ष पञ्चा सिंहले सोधिन १९ जेठमा । पार्टी अध्यक्ष प्रचण्ड र फ्याक्सन इञ्चार्ज हितमान शाक्य सुमनलाई बोधार्थ पठाउँदै अध्यक्ष सिंहले कार्कीलाई २४ घण्टे स्पष्टिकरण सोधिन ।

कार्कीलाई उपदेश यादव, बालकुमार केसी, बसन्ता भण्डारीलगायतले साथ दिइरहेका थिए । यद्यपि, उनीहरूलाई भने स्पष्टिकरण सोधिएको थिएन । कार्की महासचिव र यादव, केसीलगायत पदाधिकारीका आकांक्षी थिए ।

क्रान्तिकारीको ४१ सदस्यीय पदाधिकारीमा कार्की अहिले एक जना मात्रै पदाधिकारी छन्, उनको पक्षमा । त्यस्तै १९९ जनाको केन्द्रीय समितिमा ७ जना केन्द्रीय समिति सदस्य मात्रै उनको पक्षमा रहेको क्रान्तिकारी नेताहर”को भनाइ छ ।

थप एक सय जना केन्द्रीय समितिमा थप्न बाँकी छ । त्यसका लागि विभिन्न क्लष्टरबाट थपिने छन् । यसो गर्दा छात्रा बढी पर्ने सम्भावना अधिक छ । केन्द्रीय समितिमा थपिनेलाई अहिले केन्द्रीय प्रतिनिधिका रुपमा राखिएको छ ।

पार्टीका वरिष्ठ नेता नारायणकाजी श्रेष्ठ समूहको बलियो साथमा कार्कीले आफूहरूलाई पेलेको भन्दै लडेरै जाने निर्णयमा पुगेका थिए । अध्यक्ष सिंहले सोधेको स्पष्टिकरणको जवाफ कार्कीले दिएनन् । थप कार्यक्रमको आन्तरिक तयारीमा जुटे ।

त्यसपछि सिंहले सचिवालयको आपतकालीन बैठक बोलाएर कार्कीलाई हिजो शनिबार संगठनबाट निलम्बन गर्ने निर्णय लिइन् । उक्त निर्णयको जानकारी गराउने उद्देश्यले उनले पदाधिकारी टिम नै बोकेर अध्यक्ष प्रचण्ड निवास पुगिन् ।

प्रचण्डले विद्यार्थी संगठनभित्र देखा परेको विवाद र अराजकताका सन्दर्भमा कार्की समूहलाई पनि खुमलटार नै बोलाए । फयाक्सन इन्चार्ज हितमान शाक्यसमेत राखेर कार्कीलाई समानान्तर कार्यक्रम तत्काल स्थगित गर्न निर्देशन गरे ।

विद्यार्थी संगठनभित्रको विवादका विषयमा पार्टी केन्द्रको विस्तारित बैठक बोलाएर छलफल गर्ने र पार्टीले एउटा निर्णय दिने आश्वासन दिएर प्रचण्डले दुवै पक्षलाई आरोप प्रत्यारोप, समानान्तर गतिविधि रोकेर एकताबद्ध भएर जान निर्देशन गरे ।

शनिबार प्रचण्ड निवासमा प्रचण्डले पहिले कार्की समूहसँग र पछि अध्यक्ष सि‍हसहितको क्रान्तिकारीको पदाधिकारीसँग छलफल गरेका थिए । कार्की समूहपछि भने दुवै पक्षलाई सँगै राखेर फोटो सेसन गराइएको थियो ।

त्यसपछि शनिबार साँझ नै कार्कीले आज दिउँसो २ बजे थापाथलीस्थित क्याम्पसमा बोलाइएको उपत्यका स्तरीय कार्यक्रम स्थगित गरेको सूचना जारी गरे । त्यसपछि हो- माओवादी केन्द्रको आज बसेको विस्तारित बैठकले विद्यार्थी संगठनभित्रको विवादमा केन्द्रीत रहेर छलफल गरेको ।

कार्की समूहले विद्यार्थीको विशेष राष्ट्रिय सम्मेलनको माग गरेको छ । गत वैशाख ३० गते सम्पन्न स्थानीय तह निर्वाचनमा उम्मेदवार बनेका र जितेका विद्यार्थी संगठनका नेताहरूको स्थानका कार्की समूहको अहिले बढी केन्द्रीत छ । यो ठाउँबाट कार्की पक्षले धेरै आफ्ना समूहका नेतालाई सुरक्षित गर्ने रणनीतिअनुरुप विवाद चर्काइरहेको आरोप पनि कार्की समूहमाथि छ ।

तर, पार्टीको बैठकले दुवै पक्षलाई राखेर पार्टीका तर्फबाट मिलाउन पहल लिने निर्णय गरेको नेता हरिवोल गजुरेलले जानकारी दिए । ‘विद्यार्थीभित्र जे समस्या देखा परेको छ, त्योबारेमा विस्तृत छलफल पार्टी केन्द्रको कार्यालयको विस्तारित बैठकमा भयो । अहिले तत्काललाई दुवै पक्षलाई राखेर एउटा सहमति गर्ने र छिट्टै विद्यार्थीको राष्ट्रिय सम्मेलनका लागि पहल गर्ने निर्णयमा हामी पुगेका छौँ ।’