काठमाडौँ । नेकपा माओवादी केन्द्रका प्रमुख सचेतक देव गुरुङले माओवादी द्वन्द्व कालीन घटनामा अन्तर्राष्ट्रिय फौजदारी अदालत आकर्षित हुन नसक्ने बताएका छन् ।

आइतबार बसेको प्रतिनिधिसभा बैठकमा उनले द्वन्द्व कालीन विषय राष्ट्रिय मुद्दा रहेको र यसलाई राष्ट्रिय स्तरमै समाधान खोज्नु पर्ने बताए । तर, राष्ट्रिय स्तरमा समाधान गरिनु पर्ने मुद्दालाई केही संस्थाले डलरको खेती गरेर नेपालीबीच फाटो ल्याउने काम गरेको उनको भनाइ छ ।

‘द्वन्द्व कालीन मुद्दामा अन्तर्राष्ट्रिय फौजदारी अदालत आकर्षित हुँदैन,’ गुरुङले भने, ‘यो राष्ट्रिय मुद्दा हो, राष्ट्रिय रुपमा व्यवस्थापन गरिनु पर्छ, राष्ट्रिय मुद्दा हुँदै पनि कतिपय पश्चिमा डलरमा चलेका कतिपय मानवअधिकार नामका संस्थाले जुन ढंगले खेती गरिरहेको छ, नेपालीबीच मिल्न नदिने र द्वन्द्व व्यवस्थापन गर्न नदिने । दलबीच मिल्न नदिने र देश सहज रुपमा अगाडि बढ्न नदिने प्रवृत्ति देशको स्वाधिनताको आत्मघाती कार्य हो, यो रोकिनु पर्छ ।’

द्वन्द्व कालीन घटना उचालेर नेताको विदेश भ्रमणसमेत प्रभावित पार्न खोजेको भन्दै उनले आपत्ति जनाए ।