काठमाडौँ । नेकपा एकीकृत समाजवादीका अध्यक्ष माधव नेपालले अमेरिकाको स्टेट पार्टनरसिप प्रोग्राम (एसपीपी) रद्ध गरेकाले प्रधानमन्त्री शेरबहादुर देउवाले अमेरिका भ्रमण गर्न नपाएको बताएका छन् ।

शुक्रबार काठमाडौँमा पार्टीको बागमती प्रदेश कमिटीको तेस्रो बैठकलाई सम्बोधन गर्दै अध्यक्ष नेपालले एसपीपी रद्ध गरेका कारण प्रधानमन्त्री अमेरिका भ्रमण गर्न नपाएको दाबी गरेका हुन् । उनले एमसीसीलाई व्याख्यात्मक घोषणा गरेरमात्रै पास गर्नु नै ठूलो कुरा भएको बताए ।

अध्यक्ष नेपालले व्याख्यात्मक घोषणासहित एमसीसी पास गरेसँगै अमेरिकीको नेपाल भ्रमण बढेको र तिब्बती शरणार्थी शिविरमा पुगेको बताए । उनले एमसीसी जस्ताको त्यस्तै पास गरेको खण्डमा देश तहसनहस हुने दाबी गरे ।

‘हामीले एमसीसीलाई पनि यथास्थितिमा पास हुन दिएनौँ, व्याख्यात्मकसँग जोड्यौँ, इण्डोप्यासिफिकको अंग हुन्छ भने अस्वीकार गर्छौं भन्यौँ, यथास्थितिमा पास भएको भए नेपालको राजनीति थाहा छ ? व्याख्यात्मक टिप्पणी राख्दा अमेरिकीको लर्को लाग्न थालेको थियो, यहाँ आएर तिब्बती क्याम्पमा जान थाले,’ उनले भने, ‘सरकारी गाडी अघि–पछि घुमाउन थाले ।’

यस्तै, अध्यक्ष नेपालले एमालेलाई अहिले धेरै प्रहार गर्नु नहुने बताएका थिए । उनले आफ्नो पार्टीमाथि एमालेले प्रहर नगरेको उल्लेख गर्दै एमालेलाई पनि प्रहार गर्नु उचित नभएको बताएका हुन् ।