काठमाडौँ । बलिउड अभिनेता रणवीर कपुर र अभिनेत्री आलिया भट्ट आमा–बुवा बन्ने भएका छन् । हालै फिल्म ‘शमशेरा’को प्रमोशनका लागि हिँडेका रणवीरले बाबु बन्ने कुराबारे खुलेर बोलेका थिए ।

यस क्रममा उनले एक टिप्पणी गरेका थिए । यसपछि उनीहरू जुम्ल्याहा बच्चाको अभिभावक बन्ने आशंका गरिएको छ ।

फिल्म कम्प्यानियनलाई दिएको अन्तर्वार्तामा रणवीरलाई दुई सत्य र एउटा झुटको खेल खेल्न भनिएको थियो । केही सेकेण्ड सोचेपछि रणवीरले भने, ‘मेरो जुम्ल्याहा छ, म धेरै ठूलो पौराणिक फिल्मको हिस्सा बन्न लागेको छु, कामबाट लामो ब्रेक लिइरहेको छु ।’

यो सुनेपछि अभिनेताका फ्यानहरूले रणवीर–आलिया जुम्ल्याहा सन्तानका अभिभावक बन्ने अनुमान गर्न थालेका छन् । जहाँ एक प्रयोगकर्ताले लेखेका छन्, ‘रणवीरले गेम प्लेमा सत्य भने, अर्को प्रयोगकर्ताले लेखे, वाह, यो अचम्मको छ ।’

यसअघि आलियाले सामाजिक सञ्जालमा अस्पतालको तस्बिर शेयर गर्दै लेखेकी थिइन्, ‘हाम्रो बच्चा छिट्टै आउँदैछ ।’ तस्बिरमा उनी अल्ट्रासाउण्ड गराइरहेको देखिएकी छिन्, जसमा उनका पति रणवीर पनि उनीसँगै देखिएका छन् ।

रणवीर र आलियाले यही वर्ष १४ अप्रिलमा परिवार र केही विशेष साथीहरूको उपस्थितिमा विवाह गरेका थिए । विवाहअघि दुवै ५ वर्षसम्म सम्बन्धमा थिए । उनीहरुको पहिलो भेट सन् २०१७ मा फिल्म ‘ब्रह्मास्त्र’को सेटमा भएको थियो ।