काठमाडौँ । आगामी चुनाव नजिकिँदै गर्दा राजनीतिक दलबीच छलफल र हिसाबकिताब तीव्र बनेको छ । नेपाली कांग्रेस र नेकपा एमाले मुख्य प्रतिस्पर्धा हुने चुनावमा तेस्रो शक्तिका रुपमा रहेको नेकपा माओवादी केन्द्र कता मिल्छ ? उतै आगामी संघ र प्रदेशसभा निर्वाचनको परिणाम जाने स्पष्ट रहेको छ ।

तर, त्यो चित्रभित्र पनि दलहरुका आआफ्ना स्वार्थ छन् । जसका कारण आफ्नो दलको स्वार्थलाई केन्द्रबिन्दु बनाएर नेताहरूले अनेक ढंगले भेटवार्ता तथा संवाद गरिरहेका छन् ।

कांग्रेसले माओवादीलाई एमालेसँग मिल्न जानबाट रोकेर सत्ता गठबन्धनभित्रै राख्ने र जसरी हुन्छ निर्वाचनमा गठबन्धनको बलसहित बहुमत जुटाउने कोसिसमा छ । माओवादी कांग्रेससँगैको गठबन्धनमा रहे पनि आफूबिना आउने पाँच वर्ष कसैको सरकार बन्न नसक्ने स्थितिको सिर्जना गर्नु छ ।

त्यसका लागि सिट बाँडफाँडको तालमेलमा कांग्रेसलाई कसरी कस्ने भन्नेमा यतिबेला कांग्रेसइतर सत्ता गठबन्धन दलका शक्तिहरुको ध्यान रहेको छ । त्यही क्रममा माओवादी केन्द्रका अध्यक्ष पुष्पकमल दाहाल ‘प्रचण्ड’ले दिउँसो नयाँ दल दर्ताको तयारीमा रहेका डा. बाबुराम भटटराईसँग संवाद गरेका थिए ।

अहिले उनै प्रचण्डले सत्ता गठबन्धनभित्र उपगठबन्धन निर्माण गरेर कांग्रेसमाथि दबाबको रणनीति अवलम्बन गर्न खोजेका छन् । त्यही क्रममा अहिले सिहंदरबारमा पुनः प्रचण्ड, नेकपा एकीकृत समाजवादीका अध्यक्ष माधव नेपालसहितका नेताहरूको छलफल शुरु भएको छ ।

छलफलमा माओवादीका अध्यक्ष प्रचण्ड, नेता नारायणकाजी श्रेष्ठ, एकीकृत समाजवादीका अध्यक्ष नेपाल, सम्मानित नेता झलनाथ खनाल, नेकपा एकता राष्ट्रिय अभियान नामक पार्टीका नेता बामदेव गौतमलगायतको सहभागी रहेका छन् ।